Նիկոլ Փաշինյանը մարտահրավեր նետեց Սերժ Թանկյանին, Քիմ Քարդաշյանին և Ալեքսիս Օհանյանին

Ստեղծման օրից «Հայաստան» համահայկական հիմնադրամի միջոցներով 635 կիլոմետր ճանապարհ է կառուցվել, 970 ընտանիքների համար բնակարաններ են կառուցվել, ինչպես նաև 585 կմ՝ ջրագիծ, 364 կառուցված, վերանորոգված, կամ վերակառուցված դպրոց, 75 կառուցված կամ նորոգված բուժհաստատություն, 59 մշակութային և սպորտային կենտրոն, 29 համայնքային կենտրոն, 115 ջերմոց, 173 կրթական, գիտական և մշակութային ծրագիր է իրականացվել։ Այս մասին այսօր՝ նոյեմբերի 28-ին, «Հայաստան» համահայկական հիմնադրամի ամենամյա հեռուստամարաթոնին ասաց ՀՀ վարչապետ Նիկոլ Փաշինյանը։

«Հիշում եք, որ ես լրագրող եմ, ապա եղել եմ ընդդիմադիր պատգամավոր, ով սիրում է հարցեր տալ։ Եվ ես ինքս ինձ հարց տվեցի՝ «Հայաստան» համահայկական հիմնադրամը 27 տարվա ընթացքում ինչքան գումար է հավաքել և պարզվեց, որ այդ գումարը 370 միլիոն դոլարի կարգի է։ Եղել են նաև ոչ գումարային նվիրատվություններ։ Մենք 27 տարի նույն շրջանակից ակնկալել ենք գումար, սա խնդիր է և որոշակի վստահության խնդիր գոյություն է ունեցել։ Մենք պետք է փոփոխություն անենք․ խոշոր, բայց սահմանափակ թվով մարդկանց նվիրատվությունից պետք է անցում կատարենք փոքր, բայց մեծ թվով մարդկանց նվիրատվության տրամաբանությանը»,-նշեց նա։

 Փաշինյանը մարաթոնին մարտահրավեր նետեց աշխարհահռչակ հայերից Սերժ Թանկյանին, Քիմ Քարդաշյանին եւ Ալեքսիս Օհանյանին․ «Եթե 5 միլիոն հայ տարվա ընթացքում նվիրի հիմնադրամին 200 դոլար կամ ամիսը 20 դոլար կամ 20-ից մի քիչ շատ, տարվա կտրվածքով կունենանք 1 մլրդ 250 միլիոն դոլար։ Հիմնադրամի ամեն կոպեկի ծախսման արդյունավետությունը լինելու է կրկնակի, եռակի հսկողության տակ, մենք բացառելու ենք որևէ չարաշահում։ Ես այսօր մտել եմ հիմնադրամի էջ և կարգավորումն այնպես եմ դրել, որ ամեն ամիս 10 հազար դրամ նվիրաբերվի հիմնադրամին։ Ես մարտահրավեր եմ նետում 3 հայի՝ Սերժ Թանկյանին, Քիմ Քարդաշյանինև Ալեքսիս Օհանյանին։ Շատ կարևոր է, որ այս պրոցեսը անեք հրապարակային և մարտահրավեր նետեք ևս երեք հայի»։