Ինչու՞ աշխատողները պետք է վճարեն չաշխատողների համար․ Արսեն Թորոսյանը պատասխանել է բժշկական ապահովագրության դեմ բերվող փաստարկներին

Հայաստանում առողջության համապարփակ ապահովագրության ներդրման հայեցակարգի նախագիծը արդեն տեղադրվել է E-draft կայքում։ Այս մասին նոյեմբերի 23-ին իր ֆեյսբուքյան էջի միջոցով տեղեկացրեց ՀՀ առողջապահության նախարար Արսեն Թորոսյանը։

Ըստ նախարարի՝ այս թեմայի շուրջ քննարկումները սխալ ուղղությամբ են գնում: Այսօր առողջության համապարփակ ապահովագրության դեմ հիմնականում արտահայտվում են այն մարդիկ, ովքեր արդեն ունեն կամավոր բժշկական ապահովագրություն, ինչպես նաեւ այն մարդիկ, ովքեր ունեն բարձր եկամուտներ։

«Մենք մեր առողջության վրա ազգովի ծախսում ենք ավելի շատ գումար, քան առաջարկվում է նոր մեխանիզմով հավաքագրել: Բացարձակ կարևոր չէ ֆինանսի աղբյուրը, կարևորը նպատակն է: Եթե նպատակին բոլորս համաձայն ենք, ապա աղբյուրների մասին կարող ենք բանավիճել: Իսկ մեր նպատակը, որպես առողջապահության նախարարություն և սոցիալական պետություն, հետևյալն է. ունենալ համապարփակ ծածկույթ Հայաստանի Հանրապետության ամբողջ ազգաբնակչության համար։ Քանի որ մենք ամեն դեպքում այդ գումարները ծախսում ենք առողջության վրա, մենք ընդամենը առաջարկում ենք այդ գումարների հավաքման եւ բաշխման նոր մեխանիզմ, որը ավելի էֆֆեկտիվ է, ավելի արդար է եւ ավելի լավ արդյունքներ է բերելու պետության համար», - ասաց նախարարը:

Արսեն Թորոսյանը հիշեցրեց, որ այս նախագիծը կառավարությունում արդեն 1.5 տարի է քննարկվում է: Նախկին կառավարության օրոք ևս նախագիծը բազմիցս քննարկվել է:

Նախարարը երկու փաստարկ առանձնացրեց, ըստ որոնց մարդիկ դեմ են նախագծին:

«Հիմա անդրադառնամ այն խմբի հիմնական արգումնետին, ովքեր ասում են՝ մենք, միևնույնն է, ունենք ապահովագրություն: Դրա պատասխանը հետևյալն է. դուք չպետք է վճարեք և գործատուն նորից չպետք է վճարի առողջության ապահովագրության համար, քանի որ պետությունը նոր մեխանիզմ ներդնելով արդեն լուծում է այդ հարցը։ Ոչ ոք երկու անգամ չի վճարելու առողջության ապահովագրության համար, քանի որ մեր առաջարկած համակարգը, որը դրված է հանրային քննարկման, այնքան լավն է, որ հավելյալ ծախսի կարիք պրակտիկորեն չի առաջանալու», - ասաց Արսեն Թորոսյանը:

Մարդկանց մի խումբ էլ, նախարարի խոսքով, ասում է, թե ինչու պետք է աշխատողները վճարեն չաշխատողների համար.

«Հիշեցնեմ, որ այդ չաշխատողների մեջ են մտնում մեր իսկ ծնողները, հարազատները, ուսանող-երեխաները, դեռ չաշխատող երեխաները: Դրա մեջ ենք մտնում մենք. որևէ հիվանդության պատճառով մենք կարող ենք զրկվել աշխատունակությունից: Ես որևէ հիվանդության պատճառով կարող եմ այլևս չաշխատել, բայց ես նորից կմնամ ապահովագրված», - ասաց Արսեն Թորոսյանը:

Նախարարի խոսքով, երբ մարդիկ հարցնում են, թե ինչու աշխատողները պետք է վճարեն չաշխատողների համար, դա նույնն է, ինչ մարդիկ հարցնեն, թե ինչու պետք է իրենց վճարած հարկերի հաշվին կառուցած ճանապարհով երթեւեկեն նաեւ այն մարդիկ, ովքեր հարկեր չեն վճարում։

«Ես երեկ նորից նշեցի, որ այն հարկատեսակը, որը մենք առաջարկում ենք, կարող է լինել 0 դրամ: Եթե մենք այդ աղբյուրը գտնենք այլ տեղից, մենք մտադրություն չունենք որևէ մեկի վրա հավելյալ հարկատեսակ դնելու», - շեշտեց նախարարը:

Արսեն Թորոսյանը կոչ արեց քննարկումները բերել կոնստրուկտիվ դաշտ: Նշեց նաև, որ կազմակերպվելու են քննարկումներ, որոնց մասնակցելու են բոլոր կողմերը. թե՛ ապահավագրված անձինք, թեծ չապահովագրված անձինք, թե աշխատողները և թե չաշխատողները: Նախարարը հույս հայտնեց, որ քննարկումների արդյունքում մենք վերջապես կունենանք առողջության համապարփակ ապահովագրության մեր երկրի համար ամենահարմար մոդելը։