Ֆիլիպինների նախագահը Ռուսաստանից T-5000 դիպուկահար հրացան է նվեր ստացել

Ֆիլիպինների նախագահ Ռոդրիգո Դուտերտեն ռուսական T-5000 դիպուկահար հրացան է նվեր ստացել, որը նրան շատ է դուր եկել: Այս մասին РИА Новости գործակալությանը տված հարցազրույցում ասել է զենքը ստեղծող ORSIS ընկերության գլխավոր տնօրեն Վլադիմիր Զլոբինը:

«Այսօր մեր զենքը շատ երկրների ղեկավարներ ունեն: Այսպես, հոկտեմբերին Ռուսաստան կատարած վերջին այցի ժամանակ մենք Ֆիլիպինների նախագահ Ռոդրիգո Դուտերտեին T-5000 ենք նվիրել, որը նրան շատ է դուր եկել»,-ասել է Զլոբինը:

Նրա խոսքով՝ Ֆիլիպինները մեծ հետաքրքրություն է ցուցաբերում ORSIS-ի արտադրանքի նկատմամբ: Նույն այցի ժամանակ ընկերության՝ Մոսկվայում գտնվող արտադրություն էր այցելել Ֆիլիպինների պաշտպանության նախարարը և ծանոթացել զինատեսակներին:

Ընկերության գլխավոր տնօրենը հավելել է, որ T-5000-ներ կան նաև ԱՄԷ-ի շատ շեյխերի հավաքածուներում:

Մինչև վերջերս T-5000 դիպուկահարներն արտադրվում էին երկու տրամաչափով՝ 308 Winchester և 338 Lapua Magnum: Այս զենքը նախատեսված է հակաահաբեկչական գործողությունների և մասնագիտացած դիպուկահար ստորաբաժանումների համար: