Դուբայի շեյխի ու նրա նախկին կնոջ «իրավական ճակատամարտը». երեքշաբթի կայացել է զույգի երեխաների գործով վերջին դատական լսումը

Դուբայի կառավարիչ շեյխ Մուհամեդ բին Ռաշիդ Ալ Մաքթումի նախկին կինը՝ արքայադուստր Հայա բին ալ Հուսեյնը, երեքշաբթի բրիտանական դատարանում է հայտնվել՝ իր երեխաների բարեկեցության համար զույգի «իրավական ճակատամարտում» վերջին լսումների համար, գրում է Reuters գործակալությունը:

Հուլիսին երկու կողմերն էլ հայտարարել էին, որ Լոնդոնի Բարձր դատարանում քննվող գործը չի վերաբերում նրանց ամուսնալուծությանը կամ ֆինանսական հարցերին, այլ վերաբերում է իրենց երեխաների խնամակալությանը:

Աղբյուրի հաղորդմամբ՝ շեյխը երեքշաբթի կայացած լսմանը ներկա չի գտնվել:

Նախորդ լսումներից մեկում Հայան՝ Հորդանանի հանգուցյալ թագավոր Հուսեյնի 45-ամյա դուստրը և ներկայիս թագավոր Աբդալլահի խորթ քույրը, դատարանին խնդրել է իր երեխաներից մեկին պաշտպանել հարկադիր ամուսնությունից:

70-ամյա շեյխ Մոհամեդը, որը նաև Արաբական Միացյալ Էմիրությունների փոխնախագահն ու վարչապետն է, արքայադստեր հետ ամուսնացել է 2004 թվականին, ինչը համարվում է նրա վեցերորդ ամուսնությունը: Նա տարբեր կանանցից ունի ավելի քան 20 երեխա:

Ավելի վաղ հաղորդվել էր, որ արքայադուստրը ստիպված է եղել փախչել միլիարդատեր ամուսնուց, երբ վերջինիս մոտ լուրջ կասկածներ են առաջացել կնոջ և նրա բրիտանացի թիկնապահի «չափից շատ մտերմության» վերաբերյալ:

45-ամյա արքայադուստր Հայան իր երկու մանկահասակ երեխաների հետ ապրում է Լոնդոնում՝ Քենսինգթոնյան պալատից ոչ հեռու գտնվող ճոխ առանձնատանը:

Շեյխը Լոնդոնի Բարձր դատարանում հայց էր ներկայացրել 45-ամյա արքայադստեր դեմ:
Այժմ շեյխը փորձում է դատարանի միջոցով հետ ստանալ իր երեխաներին: