Չինաստանում դպրոցականները սկսել են կրել օղակներ ուշադրության վերահսկման համար

Չինաստանի Չժեցզյան նահանգում տարրական դպրոցի աշակերտները գլխներին օղակներ են կրում, որոնք վերահսկում են նրանց ուշադրությունը, տեղեկացնում է ՌԻԱ «Նովոստի»-ն՝ հղում կատարելով Beijing News-ին։

Խոսքը չինական նեյրոհամակարգչային ինտերֆեյսի մասին է, որը չափում է ուղեղի բիոհոսքերը։ Այն մոտ 3500 յուան (498 դոլար) արժե։ Օղակը գնահատում է աշակերտների կենտրոնացածությունը դասերի ժամանակ։ Այդ գնահատումները կարող են իրական ժամանակի ռեժիմում փոխանցվել ուսուցչի համակարգչին։ Սարքը նաեւ կարող է վարկանիշեր կազմել։

Օղակները չափում են ուղեղի նեյրոնային բջիջների էլեկտրական ազդանշանները, բայց չեն կարող հետեւել ուղեղի միլիարդավոր բջիջների ակտիվությանը, ուստի, սարքը կարող է սխալվել, ավելացնում է պարբերականը։

Համաձայն կոգնիտիվ հոգեբանության դասական տեսության՝ տարբեր տարիքում մարդիկ ուշադրության կենտրոնացման տարբեր տեւողականություն են ունենում։ Երեխաների մոտ այդ ժամանակը կազմում է 10-15 րոպե, տարրական դպրոցի աշակերտների մոտ կարող է հասնել 30-40 րոպեի, իսկ երիտասարդների մոտ չի գերազանցում 50 րոպեն։ Ուստի, դասերը դպրոցում տեւում են 45-50 րոպե, այնուամենայնիվ, այդ ժամանակի 20-50 տոկոսը դպրոցականները «սավառնում են ամպերում»։ Այդ ցրվածությունն այս կամ այն աստիճանով բնորոշ է բոլոր մարդկանց։