Պետք է ազատվել հեղափոխական փրփուրից. Վազգեն Մանուկյան

Երբ նայում ես, թե ինչ է կատարվում աշխարհում, եւ ինչ է կատարվում Հայաստանում, տեսնում ես, որ ինչ-որ բան չի համընկնում: Այս մասին այսօր՝ հոկտեմբերի 30-ին, լրագրողների հետ հանդիպման ժամանակ նշեց Հանրային խորհրդի նախագահ Վազգեն Մանուկյանը

Նրա խոսքով, աշխարհում նոր իրավիճակ է ստեղծվել, համընդհանուր գլոբալիզացիայի, ինտեգրացիայի պայմանները փոխվել են, բոլոր երկրներում գլուխ են բարձրացնում այն ուժերը, որոնք ազգային են, պետականամետ են:

«Սկսվել են առեւտրային պատերազմներ ԱՄՆ-ի, Չինաստանի, Ռուսաստանի, Եվրոպայի միջեւ: Բոլոր այդ պետություններում վերադարձ է կատարվում իրենց ազգայինին: Տարածաշրջանում մեծ փոփոխություններ են տեղի ունենում. այստեղ Ռուսաստանը դերակատարությունը կտրուկ բարձրացել է, նոր հարաբերություններ են ստեղծվել Ռուսաստան-Ադրբեջան-Թուրքիա-Իրան հարթությունում:

Թվում էր՝ մենք դրա վրա պետք է կառուցենք մեր քաղաքականությունը, որովհետեւ առաջ են գալիս նոր մարտահրավերներ, նոր վտանգներ եւ նոր հնարավորություններ:

Իսկ ինչ է կատարվում Հայաստանում. ես երբեք մեր հասարակությունն այսքան բզկտված չէի տեսել: Իրար նկատմամբ թույնով լցված, արժեքավոր մարդկանց նկատմամբ քայլերով: Օրինակ, Արա Բաբլոյանի դեմ այդ գործը, որ հարուցել են, ուղղակի զարմանք է առաջացնում: Հայաստանի լավագույն բժիշկներից մեկը, որով մենք հպարտանում ենք աշխարհում, մեկ էլ ինչ-որ ստորակետ սխալ կամ ճիշտ է դրել, դրա պատճառով նրա դեմ քրգործ են բացում: Հանում են Ղարաբաղի պաշտպանության նախարարին, որն իրենց կարծիքով մի նախադասություն ճիշտ չի ասել: Անարժեք մարդիկ հետապնդում են այս պետության համար արժեքավոր, մեծ ջանքերով մեծ արդյունքների հասած մարդկանց»,-հայտարարեց Վազգեն Մանուկյանը:

Նա նաեւ հավելեց, որ այս պայմաններում Հայաստանը պետք է լիներ կոնսոլիդացված. «Ոչ թե պետք է գնալ դրսում հայտարարել, թե հեղափոխություն ենք արել, ժողովրդավար ենք: Աշխարհում արդեն ժողովրդավարությունն այն արժեքը չունի, դա արժեք ունի մեր երկրի ներսում: Իհարկե, կարելի է իրավիճակը լավացնել, բայց դա իշխանությունից պահանջում է կտրուկ փոխել իրենց վարած քաղաքականությունից, ազատվել հեղափոխական փրփուրից: Միշտ հեղափոխությունից հետո փրփուր է առաջանում, անարժան մարդիկ փորձում են պղտոր ջրում ձուկ որսալ: Կկարողանա՞ իշխանությունը դա անել, ես չգիտեմ»,-ընդգծեց Հանրային խորհրդի նախագահը՝ հավելելով, որ դա կախված է նաեւ հասարակությունից, թե նա իր եւ իշխանության առջեւ ինչ խնդիրներ է դնում: