Խոստանում են 10 մլն ծառատունկ, բայց առանց բյուջեի հատկացման. Մանե Թանդիլյան

2020 թ-ի բյուջեի նախագծի քննարկմանը ԱԺ «Լուսավոր Հայաստան» խմբակցության պատգամավոր Մանե Թանդիլյանը Շրջակա միջավայրի նախարար Էրիկ Գրիգորյանից հետաքրքրվեց, թե 10 մլն ծառատունկի մասին հայտարարվել է, սակայն որևէ ծրագրում դրա արտացոլումը չկա: «Ի՞նչ միջոցներ են նախատեսված սրա համար»,- հարցրեց նա:

Նախարարն ասաց, որ 2020 թ-ին անտառային ծրագրերի ներքո մոտավորապես 400 մլն դրամից ավելի գումար կա՝ նախատեսված անտառները վերականգնելու աշխատանքների համար, սակայն 10 մլն ծառերի ծրագիրն այլ ֆինանսավորման գործընթացներ է ենթադրում: «Մենք արդեն կապի մեջ ենք Բելառուսի, Ռուսաստանի, Ղազասխանի, Վրաստանի գործընկերների հետ, նախնական պայմանավորվածություններ ունենք՝ տնկիների մասով և որոշ այլ մասերով համատեղ ծրագիր իրականացելու: Բայց ուզում եմ նշել, որ ինչպես վարչապետը նշեց, համահայկական ծրագիր է և գաղափարն այն է, որ ծրագրին լայն մասնակցություն ունենան ինչպես ՀՀ-ի տարբեր շահառուներ, մասնակիցներ, բիզնես կառույցներ, դպրոցներ, այնպես էլ Սփյուռքից, մեխանիզմներ են մշակվում որոշ ռեսուրսներ գեներացնելու ուղղությամբ»,-ասաց նա:

Ըստ նախարարի՝ 10 մլն տնկի տնկելու համար առանձին հոդված կամ գործողություն նախատեսված չէ:

Մանե Թանդիլյանը հայտարարեց, թե ստացվում է, որ խոստանում են, բայց առանց բյուջեի: «Կարելի է քննարկել, հասկանալ՝ ինչպես է ստացվում»,-ասաց նա: