Փաշինյանն այլ երկիր է տեսնում, իսկ ժողովուրդն՝ այլ

Այսօր լսելով Նիկոլ Փաշինյանին ակամա հիշեցի այն անեկդոտը, որտեղ ծերուկը աղեկտուր լալով գոռում է, թե ցանկանում է Հայաստանում ապրել, իսկ երբ տնեցիները ասում են, թե դու հենց Հայաստանում էլ ապրում ես, նա պատասխանում է՝ ուզում եմ նորությունների Հայաստանում ապրել: 

Նիկոլ Փաշինյանն անզեն աչքով տնտեսական հեղափոխություն է տեսնում, իսկ մենք՝ մի վարկը չփակած մյուս վարկին անցնողների, Փաշինյանը ուսուցիչների բարձրացող աշխատավարձեր է տեսնում, իսկ մենք օրվա հացը մի կերպ վաստակող ուսուցիչների, որոնք զարմացած են մնում նախարարների աշխատավարձերի բարձրացումից:

Ո՞ր երկրում, ո՞ր երկնքում է ապրում Փաշինյանը՝ դժվար է ասել, բայց նա արդեն Հայաստանի իրականության հետ որեւէ կապ չունի: Նա հայտարարում է, թե Հայաստանում հսկայածավալ ներդրումներ են իրականացվում, իսկ մենք այդ ներդրումները չենք տեսնում, այդ ներդրումների հետեւանքները չենք զգում:

Որտե՞ղ են արվում այդ ներդրումները: Մի՞թե ներդրում ասելով Փաշինյանը նկատի ունի իր առանձնատան, ավելի ճիշտ կառավարական առանձնատան համար հատկացված մոտ երկու միլիոն դոլարը կամ մեր թաղի Անդոյի օրերս բացված բանջարեղենի կրպակը:

Ի՞նչն է նա ներդրում համարում, դժվար է ասել: Իսկ երբ վարչապետը հպարտանում է ասֆալտի որակով, ապա չես կարող չժպտալ: 21-րդ դար, չինացիները պատրաստվում են տիեզերակայան բացել Լուսնի վրա, ամերիկացիները՝ Մարսի վրա, հարեւան Վրաստանում վաղուց արդեն նորմալ ասֆալտ են անում, իսկ մենք հպարտանում ենք ասֆալտի հաստությունից, այն էլ վարչապետի մակարդակով:

Ինչ ասես կարող էինք սպասել նոր կառավարությունից, Փաշինյանի կառավարությունից, բայց որ կառավարման երկրորդ տարում կհետեւենք նրա չեռնենկոյացմանը, հաստատ չէինք սպասում:

Ի դեպ, ՀՀ քաղաքացիները շատ են ուզում հասկանալ, թե այդ որտեղ եւ ում կողմից են արվում հսկայածավալ ներդրումները: Հրապարակեք ողջ ցուցակը պարոն Փաշինյան, ինչպես կասեր Գայդայի հերոսներից մեկը:

Հակոբ Ասատրյան

Top-News.am