ՊԵԿ-ում գործում է պարգեւավճարների հստակ սխեմա․ Դավիթ Անանյան

Պետական եկամուտների կոմիտեում գործում է պարգեւավճարների հստակ սխեմա։ Այս մասին այսօր՝ հոկտեմբերի 24-ին, լրագրողների հետ զրույցում ասաց ՊԵԿ նախագահ Դավիթ Անանյանը։

«ՊԵԿ-ում կանոնակարգված է, որ 0․3-ից 1․3 գործակցով գնահատվում են բոլոր աշխատողներն իրենց կատարած աշխատանքի եւ դրսեւորած վարքագծի համար, յուրաքանչյուր ամիս ես բոլորի պարգեւավճարները հաշվարկում եմ իմ համակարգչով, եւ կարող է այդ գործակցով աշխատակից լինի, որ ստանա բարձր կամ ցածր պարգեւավճար»,-նշեց նա։

Անանյանի խոսքով՝ որոշում կայացնողները, որոնք բաժնի պետերն են եւ բարձր, շուրջ 290 հոգի՝ ՊԵԿ-ում, նրանց պարգեւավճարներն ավելի բարձր են, քան շարքային աշխատողները։

Նրա փոխանցմամբ՝ տեսուչների միջին աշխատավարձը 130-150 հազար է․ «Տեսուչի աշխատավարձը 130-150 հազար դրամ է առանց եկամտային հարկի, իհարկե դա բավարար չէ, դրա համար մենք աշխատում ենք, որ նա ունենա իր պարգեւավճարը, որ կարող է տատանվի աշխատավարձի 50-70 տոկոսի սահմաններում»։