Եթե մեկի գլուխը «պադեզդում» սխկեցին, ուրեմն ուժեղ, նորմալ իշխանություն է, եթե չսխկեցին, ուրեմն թույլ է. Փաշինյան

Նիկոլ Փաշինյանը այսօր տնտեսական հեղափոխության վերաբերյալ հրավիրված երկրորդ խորհրդաժողովին անդրադարձավ տարբեր հարցերի, այդ թվում՝ Հայաստանում կորպորատիվ կառավարման կուլտուրային, խոսեց սեփականության իրավունքի հետ կապված հարցի մասին, հատկապես կարևորեց մի հանգամանք:

«Ինքներս մեզ զսպելով՝ կարևոր քաղաքական դիրքորոշում ենք որդեգրել, նախորդ մեկուկես տարում սեփականության վերաբաշխման դեպք չի եղել, շատ մեծ է եղել գայթակղությունը, երբ մի շարքային կնոջ անունով գրած է եղել սեփականություն, և մենք գիտենք, որ դա պատկանում է կոնկրետ բարձրաստիճան պաշտոնյայի, ձեռք է բերվել կոնկրետ միջոցներով, և մեծ է գայթակղությունը ԱԱԾ-ին ասել, որ կնոջը բերեք և ասեք՝ թող ինքը գրի նոտարով, որ այդ սեփականությունը նվիրում է պետությանը: Քաղաքական առումով հնարավոր է նույնիսկ արդարացված համարվի, բայց մենք, ատամները կրճտացնելով, գիտենք, որ չի կարելի այդպիսի բան անել, որովհետև եթե թեկուզ ֆեյք սեփականությունն այդ ճանապարհով վերցնում ես, բոլորը կմտածեն, թե նույնը կարող է իրենց հետ տեղի ունենալ»,- ասաց վարչապետը:

Նա սա կապեց, իր խոսքերով՝ «զոռբայության ծուղակի հետ».

«Սա կապված է «զոռբայության ծուղակի հետ», որի հայելային արտահայտությունը «չզոռբայության ծուղակն» է, երբ որ իշխանությունը զոռբա չի, բոլորին թվում է, թե իշխանությունը թույլ է, որովհետև հարց է ծագում՝ էս մեկը հարցազրույց տվեց, քննադատեց, մի շաբաթ սպասենք, եթե մեկի գլուխը «պադեզդում» սխկեցին, ուրեմն ուժեղ, նորմալ իշխանություն է, եթե չսխկեցին, ուրեմն թույլ է, որովհետև ուժեղ իշխանության կաղապարը ձևավորվել է, որ քաղաքական հակառակորդին պետք է «պադեզդում» գյուլես, փոխաբերական իմաստով: Սա զոռբայության պայմաններում ապրած հասարակության արձագանքն է փոփոխություններին»: