ԱԺ փոխխոսնակը Սահմանադրական դատարանի նախագահին «սատանայի փաստաբան» անվանեց

Սահմանադրական դատարանի նախագահ Հրայր Թովմասյանը հանրության եւ Հայաստանի քաղաքացիների վստահությունը չի վայելում, քանի որ նախկին իշխանությունների օրոք կատարել է «սատանայի փաստաբանի» դերը: Հոկտեմբերի 3-ին ԱԺ նիստում իշխող «Իմ քայլը» դաշինքի ներկայացրած՝ Հրայր Թովմասյանին Սահմանադրական դատարանի նախագահի լիազորություններից զրկելու նախաձեռնության քննարկման ժամանակ ասաց ԱԺ փոխխոսնակ Ալեն Սիմոնյանը:

Սիմոնյանի խոսքով՝ Թովմասյանը ժամանակին օրենք է մշակել, որը նախկին նախագահ Սերժ Սարգսյանին թույլ է տվել նրան նշանակել Սահմանադրական դատարանի նախագահ: «ՍԴ դատավորները եւ ընդհանրապես դատավորները պետք է վայելեն քաղաքացիների վստահությունը: Ես պնդում եմ, որ դուք այդ վստահությունը չեք վայելում: Չեք վայելում, որովհետեւ Սերժ Սարգսյանի համար եք Սահմանադրությունը գրել, Ընտրական օրենսգիրքը գրել, որ նա կարողանա տեսնել՝ ով եւ որքան ձայն է իրեն բերում իշխանության վերարտադրման համար»,- հայտարարեց խորհրդարանականը՝ հեռակա դիմելով ՍԴ ղեկավարին եւ ակնհայտորեն «մոռանալով», որ անցյալ տարի արտահերթ ընտրությունները, որոնցում հաղթել էր «Իմ քայլը», անցկացվել էին նույն ԸՕ-ով:

Փոխխոսնակի կարծիքով՝ ՍԴ գործող նախագահը Սերժ Սարգսյանի գործողությունների համար իրավական քողարկում է ապահովել եւ դրա դիմաց պաշտոն է ստացել:

Նշենք, որ եթե խորհրդարանը նախագիծը ընդունի, այն պետք է ուղարկվի Սահմանադրական դատարան: Նախագծի ընդունման համար անհրաժեշտ է 80 պատգամավորի ձայն, այսինքն՝ խորհրդարանականների ընդհանուր թվի 3/5-ը: Այն, սակայն, խորհրդատվական բնույթ ունի: Վերջնական որոշումը պետք է ընդունի Սահմանադրական դատարանը ձայների 2/3-ով: