Շուրջ 86 միլիոն դրամ եկամուտ, 200.000 դոլար դրամական միջոց. փոխնախարարի ունեցվածքը

«Փաստը» գրում է. «ՀՀ տարածքային կառավարման և ենթակառուցվածքների նախարարի տեղակալ Բագրատ Բադալյանի եկամուտների հանրագումարը 2018 թվականին կազմել է 86 054 006 ՀՀ դրամ:

Այս մասին տեղեկանում ենք ՀՀ բարձրաստիճան պաշտոնատար անձանց էթիկայի հանձնաժողովի պաշտոնական կայքում հրապարակված տվյալներից:

Հանձնաժողովին ներկայացրած 2018 թ. տարեկան հայտարարագրի համաձայն՝ նշված եկամտից 8 384 000 ՀՀ դրամը և 3 670 006 ՀՀ դրամը գոյացել են աշխատավարձերից:

Վերոնշյալ հանրագումարից 45 000 000 ՀՀ դրամը շահաբաժին է, իսկ 29 000 000 ՀՀ դրամը գոյացել է գույքի վաճառքից:

Բ. Բադալյանը ստացել է նաև 2270 ԱՄՆ դոլար եկամուտ, որը ևս գոյացել է աշխատավարձից:

Բացի վերոնշյալ եկամտից, Բագրատ Բադալյանը ներկայացրել է տվյալներ նաև դրամական միջոցների վերաբերյալ:

Հայտարարատու պաշտոնատար անձի դրամական միջոցը 2018թ. հարկային տարվա սկզբում կազմել է 200 000 ԱՄՆ դոլար, 2018թ. հարկային տարվա վերջում նշված դրամական միջոցը նույն չափով պահպանվել է:

Բագրատ Բադալյանը տարածքային կառավարման և ենթակառուցվածքների նախարարի տեղակալ է նշանակվել 2019 թվականի հունիսի 4-ին, իսկ մինչ այդ զբաղեցնում էր տրանսպորտի, կապի և տեղեկատվական տեխնոլոգիաների նախարարի տեղակալի պաշտոնը»,-գրում է թերթը:

Մանրամասները՝ թերթի այսօրվա համարում: