Վերջին 5 տարիները դարձել են պատմության մեջ ամենաշոգը

Համաշխարհային մետեորոլոգիական կազմակերպության (ներառված է ՄԱԿ-ում) տվյալներով՝ Երկրի վրա 2015-2019 թվականներին օդի ջերմաստիճանը եղել է 1,1°С-ով բարձր, քան մինչինդուստրիալ փուլում եւ 0,3°С-ով բարձր, քան 2011-2015 թվականներին: Դրան ուղեկցել է մթնոլորտում ածխաթթու գազի արտանետումների ռեկորդային քանակն ու ծովի մակարդակի բարձրացումը, հաղորդում է «Կոմերսանտ»-ը:

2016 թվականին 195 երկրների կողմից ստորագրված կլիմայի փոփոխության մասին Փարիզյան համաձայնագրի համաձայն՝ որոշում է ընդունվել սահմանափակել Երկրի վրա միջին ջերմաստիճանի աճը առնվազն 2°С-ով մինչեւ 2100 թվականը: Դրա համար, ըստ կազմակերպության տվյալների, մթնոլորտում ածխաթթու գազի արտանետումները պետք է հասնեն իրենց գագաթնակետին 2020 թվականին եւ դրանից հետո լրջորեն նվազեն: Սակայն նոր զեկույցում ասվում է, որ իրենց գագաթնակետին կարող են չհասնել նույնիսկ մինչեւ 2030 թվականը, ինչը կհանգեցնի մինչեւ 2100 թվականը 3°С-ով միջին ջերմաստիճանի բարձացմանը:

Ավելի վաղ Օվկիանոսների եւ մթնոլորտի ուսումնասիրման ԱՄՆ-ի ազգային վարչությունը (NOAA) հայտնել է, որ 2019-ի հուլիսն ուսումնասիրությունների պատմության մեջ ամենաշոգն է եղել: Երկրի վրա այս տարվա հուլիսին միջին ջերմաստիճանը 0,95°С-ով բարձր է եղել XX դարում հուլիսին գրանցված 15,8°C միջին ջերմաստիճանից: NOAA-ն եւ նրան նախորդող կազմակերպությունները եղանակային հետազոտություններ են անցկացնում 1880 թվականից, եւ կարելի է աել, որ դա ռեկորդային ցուցանիշ է 140 տարվա ընթացքում: