Ինձ չի անհանգստացնում, որ մարդիկ կարող են ավելի անհամբեր դառնալ. Փաշինյան

Զարմանալի չէ, որ մենք մեր նախկին էլիտայի հետ մեծ դիմակայության ենք բախվում, որը փորձում է կանգնեցնել կոռուպցիայի դեմ պայքարում ՀՀ կառավարության ջանքերը: Այս մասին FOX LA-ի թղթակից Արաքսյա Կարապետյանի հետ զրույցում ասել է ՀՀ վարչապետ Նիկոլ Փաշինյանը:

«Մենք կանգ չենք առնի, որեւէ կասկած չկա »,- ասել է նա:

Խոսելով տնտեսական հեղափոխության գործընթացի մասին, Փաշինյանը նշել է, որ Հայաստանում տնտեսական լավ դինամիկա է նկատվում, եւ տնտեսական աճի կանխատեսումներն ամեն ամիս աճում են:

Հարցին, թե արդյոք այսօր Հայաստանի բնակիչները երջանիկ են, Փաշինյանը պատասխանել է, որ Հայաստանում նախկինի պես բավականին բարձր է գործազրկության մակարդակը: Ընդ որում, նա նշել է, որ անցած տարի 75 000 նոր աշխատատեղ է բացվել:

Նա նաեւ նշել է էկոհամակարգ ստեղծելու կարեւորության մասին, որի դեպքում բիզնես վարելն առավել գրավիչ կդառնա:

Հարցին՝ անհանգստացած է արդյոք, որ բարեփոխումների սպասելիս մարդիկ կարող են ավելի անհամբեր դառնալ, ՀՀ վարչապետը պատասխանել է.

«Ոչ, ես անհանգստացած չեմ: Մարդիկ տեսնում են, որ մենք մեծ փոփոխությունների փուլում ենք, եւ այդ փոփոխությունները կոնկրետ արդյունք են տալիս»: