Ջենիֆեր Էնիսթոնը բացահայտել է, թե ինչ փոփոխությունների է դիմել նախքան «Ընկերները» սերիալում հայտնվելը

Դերասանուհի Ջենիֆեր Էնիսթոնը ստիպված է եղել խիստ սննդակարգ պահել նախքան կկարողանար իր նախընտրած դերերը ստանալ Հոլիվուդում:

Ինչպես ներկայացնում է Daily Mail-ը, «Ընկերները» հեռուստասերիալի 25-ամյակին նվիրված նոր գիրքը բացահայտում է, թե ինչպես է 50-ամյա գեղեցկուհին ժամանակին ստիպված եղել ազատվել ավելորդ քաշից:

Էնիսթոնի գործակալը նրան ասել է, որ պետք է նիհարի 13-14 կգ-ով Հոլիվուդում մնալու համար: «Լոս Անջելեսը դժվար վայր էր դերասանուհի դառնալու համար, դա դժվար վայր էր կին լինելու համար, և Ջենիֆերի գործակալը ստիպում էր հավատալ դրան»,- ասվում է գրքում, որը ներկայացնում է, թե ինչպես է ստեղծվել հեռուստատեսության ոլորտը վերափոխած նախագիծը:

Ջենիֆերը բացահայտել է, թե ինչ պայքար է մղել ինքն իր հետ 1996-ին Rolling Stone-ի շապիկին հայտնվելու համար բարեկազմ արտաքին ձեռք բերելու նպատակով:

«Ես շատ էի սպիտակ հաց և մայոնեզ ուտում, բայց ստիպված էի փոփոխություններ անել: Ես Հոլիվուդում շատ դերեր չէի ստանում ծանր լինելու պատճառով: Սակայն իմ սննդակարգն ահավոր էր. տապակած կարտոֆիլ և կաթնային կոկտեյլներ, և ես իսկապես պետք է փոխեի ամեն ինչ»,- խոստովանել է դերասանուհին:

Նիհարելուց հետո նա դեր ստացավ «Ընկերները» հեռուստասերիալում, որը հեռարձակվել է 1994-2004 թվականներին:

Էնիսթոնն այսօր վերադառնում է հեռուստատեսություն՝ առավոտյան ծրագրով: