Ուկրաինայի նախագահի թեկնածու Զելենսկին պատմել է, թե ինչի մասին կխոսեր Պուտինի հետ հանդիպման ժամանակ

Ուկրաինայի նախագահի թեկնածու Վլադիմիր Զելենսկին պատմել է այն մասին, թե առաջինն ինչ կհարցներ ՌԴ նախագահ Վլադիմիր Պուտինին, եթե հանդիպեր, տեղեկացնում է ria.ru-ն:

«Եթե ես հանդիպեմ պարոն Պուտինի հետ, կհարցնեմ նրան. «Դե, վերջապես, Դուք վերադարձրել եք մեր տարածքները, որքա՞ն գումար եք դեռ պատրաստ փոխհատուցել այն բանի համար, որ վերցրել եք մեր տարածքները և օգնել եք այն մարդկանց, որոնք մասնակցել են Ղրիմում և Դոնբասում իրավիճակի սրմանը, Դուք օգնել եք նրանց՝ իրենց սարսափելի, դաժան և զզվելի ամբողջ ճանապարհի ընթացքում»,-հայտարարել է թեկնածուն ճեպազրույցի ժամանակ, որի հեռարձակումը Facebook-ով վարել է «Վեստի»-ն:

Կիրակի՝ մարտի 31-ին, Ուկրաինայում անցկացվել են նախագահական ընտրություններ: Ըստ ԿԸՀ տվյալների՝ թեկնածուներից ոչ մեկը չի հավաքել առաջին փուլում հաղթանակ տանելու համար բավականաչափ քվեներ: Մրցապայքարում ժամը 13.15-ի դրությամբ առաջինը Վլադիմիր Զելենսկին է: Երկրորդ փուլ անցնելուն հավակնում են նաև երկրի գործող նախագահ Պյոտր Պորոշենկոն և «Բատկիվշչինա» կուսակցության ղեկավար Յուլյա Տիմոշենկոն. նրանց ձայների միջև տարբերությունը չնչին է:

Ընտրությունների անցկացման վերաբերյալ թեկնածուների կարծիքները տարբեր են: Պորոշենկոն կարծում է, որ ընտրական գործընթացն անցել է առանց խախտումների, իսկ Տիմոշենկոն մեղադրում է Ուկրաինայի Անվտանգության ծառայությանը խարդախությունների համար: ՆԳՆ-ն բացել է գրեթե 40 գործ՝ ընտրություններում խախտումների մասին:

Կիևը բազմիցս մեղադրել է Մոսկվային այն բանի համար, որ վերջինս խառնվում է Ուկրաինայի գործերին, մասնավորապես՝ երկրի արևելքում հակամարտությանը՝ անջատողականների կողմից: Ռուսաստանը հերքում է այս մեղադրանքները՝ անվանելով դրանք անընդունելի: