Գրավատների և տարադրամի փոխանակման կետերի աշխատակիցները բողոքի ակցիան շարունակում են ԱԺ այգում

Գրավատների և տարադրամի փոխանակման կետերի աշխատակիցներն իրենց բողոքի ակցիան շարունակում են Ազգային ժողովի դիմաց: Նրանք մուտք են գործել ԱԺ այգի: Նրանց հետ հանդիպման է իջել ԱԺ «Լուսավոր Հայաստան» խմբակցության պատգամավոր Գևորգ Գորգիսյանը:

Քաղաքացիները պահանջում են վերախմբագրել «Պետական տուրքի մասին» օրենքում սպասվող փոփոխությունները:

Ավելի վաղ գրավատների և տարադրամի փոխանակման կետերի աշխատակիցները իրենց բողոքի ակցիան իրականացնում էին կառավարության շենքի դիմաց:

Հիշեցնենք, որ ըստ այդ նախագծի՝ 60 անգամ ավելացվելու է նշյալ ոլորտների պետական տուրքը․ գրավատների համար ներկայիս 100 000 դրամի փոխարեն սահմանվելու է 6 միլիոն, փոխանակման կետերի համար՝ 50 000-ի փոխարեն 3 միլիոն դրամ պետական տուրք: Նախագիծն առաջարկել է Կենտրոնական բանկը, նաև սահմանվել է, որ բանկերի 3 մլն պետտուրքը պետք է դառնա 7 մլն դրամ։

«Մենք երեկ հանդիպում ենք ունեցել ֆինանսների փոխնախարար Արման Պողոսյանի և ԿԲ իրավաբանական բաժնի աշխատակցի հետ: Դարձյալ նույն հիմնավորումներն էին, որ ի տարբերություն ունիվերսալ վարկային կազմակերպությունների և բանկերի, մեր ոլորտում կարգավորումները թույլ են: Պետությունն այս կարգավորման վրա մեծ գումարներ է ծախսում: Ես կարծում եմ՝ պետությունը պետք է կառուցվածքային նկարագրություն տա՝ ինչ հաշվարկների, ինչի հիման վրա է սահմանվել այդ 60-ապատիկը: Իրենք ասում են՝ մենք չենք կարող այդ ինֆորմացիան տալ, բայց որպես այդ ոլորտի ներկայացուցիչ, քաղաքացի, պահանջում ենք, որ մեզ տան նկարագիր՝ ինչպես են հաշվարկել»,- կառավարության շենքի դիմաց բողոքի ակցիայի ժամանակ ասել էր փոխանակման կետերից մեկի տնօրենը:

Նշենք, որ բողոքի ակցիային մասնակիցները հավաստիացնում են, որ հարկային նման բեռը կարող է հանգեցնել շատ գրավատների և փոխանակման կետերի փակման: Բողոքի ցույց իրականացնողները պահանջում են նաև հանդիպում վարչապետ Փաշինյանի հետ: