Բրիտանիայի կառավարությունը չի աջակցի բրեքսիթի դեմ հանրագիրը

Մեծ Բրիտանիայի կառավարությունը մտադիր չէ ընդառաջ գնալու համաքաղաքացիներին, որոնք բրեքսիթի դեմ առցանց հանրագիր են ստորագրել, չնայած այն հանգամանքին, որ հանրագրի պահանջին աջակցել է ավելի քան 5,8 մլն մարդ: Այս մասին նշված է Մեծ Բրիտանիայի ԵՄ կազմից դուրս գալու հարցերով նախարարության պատասխանի մեջ, որը հրապարակվել է խորհրդարանի կայքում հանրագրի տեքստի տակ, փոխանցում է DW-ն:

«Մենք հարգելու ենք 2016 թվականի հանրաքվեի արդյունքները եւ աշխատելու ենք ԵՄ-ից դուրս գալն ապահովելու ուղղությամբ, որն օգուտ կբերի բոլորին՝ անկախ այն հանգամանքից քվեարկել են դուրս գալու թե մնալու օգտին»,- նշված է փաստաթղթում:

Ընդունելով, որ Եվրամիության կազմում Մեծ Բրիտանիայի մնալու օգտին հանրագրին մեծ թվով մարդիկ են աջակցել, կառավարությունը, այդուհանդերձ, պնդում է, որ «ընտրողների մոտ երեք քառորդը մասնակցել է 2016 թվականի հանրաքվեին»՝ ենթադրելով, որ քաղաքական գործիչներն այս արդյունքը հաշվի կառնեն:

Կոչը հրապարակած համացանցային էջում նշվում է, որ բրիտանական խորհրդարանն այն կքննարկի երկուշաբթի՝ ապրիլի 1-ին: Մարտի 27-ի առավոտյան հանրագիրը ստորագրել էր մոտ 6 մլն բրիտանացի, մինչդեռ խորհրդարանում քննարկելու համար բավական է 100 հազար ստորագրությունը:

Միաժամանակ, մարտի 27-ին Համայնքների պալատը Եվրամիությունից Մեծ Բրիտանիայի դուրս գալու այլընտրանքային ճանապարհների հարցով քվեարկություն է անցկացնելու: «Բրեքսիթի» հետ կապված ճգնաժամից դուրս գալու տարբերակներ են դիտարկվում, մասնավորապես, Եվրամիության հետ ավելի սերտ կապը կամ երկրորդ հանրաքվեի անցկացումը: Բացառված չէ նաեւ «Բրեքսիթից» ուղղակիորեն հրաժարվելու տարբերակը՝ համապատասխան դիմումը հետ կանչելու ճանապարհով:

Երբ խորհրդարանի ստորին պալատը երկու անգամ մերժել էր Եվրամիության հետ համաձայնագիրը, Բրյուսելը համաձայնվել էր բրեքսիթի օրը հետաձգել, որը նախապես նշանակված էր մարտի 29-ին: