«Կորեան Էյր»-ը կրճատում է ծախսերը վառելիքի թանկացման պատճառով

Հարավային Կորեայի ազգային ավիափոխադրող Korean Air-ը հայտարարել է արտակարգ միջոցների կիրառման մասին՝ պայմանավորված ավիավառելիքի գների կտրուկ աճով և Իրանի պատերազմի տնտեսական ազդեցությամբ։ Ընկերության փոխնախագահ Վու Կի-հոնգը ներքին հաղորդագրությամբ տեղեկացրել է, որ էներգակիրների գները զգալիորեն գերազանցել են բիզնես ծրագրով նախատեսված մակարդակը։ Արդյունքում, ավիաընկերության ամսական վառելիքային ծախսերը զգալիորեն աճել են՝ ստեղծելով լրացուցիչ ֆինանսական ճնշում։

Ավիափոխադրողը հայտարարել է, որ ապրիլից կսկսի ներքին ծախսերի կրճատման միջոցառումների իրականացում՝ ֆինանսական կայունությունը պահպանելու նպատակով։

Վերջին տվյալներով՝ International Air Transport Association-ի համաձայն, մարտի 20-ի դրությամբ ավիավառելիքի միջին գինը հասել է մոտ 200 դոլարի մեկ բարելի համար, ինչը գրեթե կրկնակի բարձր է փետրվարի ցուցանիշից։

Միաժամանակ, հում նավթի գները պատերազմի մեկնարկից ի վեր աճել են ավելի քան 50%-ով՝ նպաստելով ավիավառելիքի թանկացմանը և ճնշում գործադրելով ավիացիոն ոլորտի վրա։