Թուրքիայում 5,5 մագնիտուդ ուժգնությամբ երկրաշարժ է տեղի ունեցել

Մարտի 13-ի վաղ առավոտյան Թուրքիայի կենտրոնական հատվածում 5,5 մագնիտուդ ուժգնությամբ երկրաշարժ է գրանցվել, հայտնում են թուրքական ԶԼՄ-ները՝ հղում անելով Թուրքիայի Արտակարգ իրավիճակների և աղետների կառավարման վարչությանը (AFAD)։

Տեղեկությունների համաձայն՝ ստորգետնյա ցնցումների էպիկենտրոնը գտնվել է Թոքաթ նահանգի Նիքսար քաղաքում։ Երկրաշարժը տեղի է ունեցել տեղական ժամանակով մոտավորապես ժամը 03:35-ին։ Սեյսմոլոգների տվյալներով՝ երկրաշարժի օջախը գտնվել է մոտ 6,4 կիլոմետր խորության վրա։ Ցնցումները զգացվել են նաև հարակից մի շարք նահանգներում, ինչի հետևանքով բնակիչների մի մասը լքել է տները և դուրս եկել փողոցներ։

Զոհերի կամ ավերածությունների մասին տեղեկություններ չեն հաղորդվել։

Թուրքիան գտնվում է ակտիվ սեյսմիկ գոտում, ինչի պատճառով երկրում հաճախ են գրանցվում տարբեր ուժգնության երկրաշարժեր։