Մոպեդները, տրիցիկլներն ու կվադրիցիկլները կմտնեն պարտադիր ապահովագրության դաշտ

ԱԺ պաշտպանության և անվտանգության հարցերի մշտական հանձնաժողովի նիստում քննարկվել է օրենքի նախագիծ, որով առաջարկվում է մոպեդները, տրիցիկլները և կվադրիցիկլները ներառել պարտադիր ապահովագրության համակարգի մեջ։ Վերջին շրջանում այս տեսակի տրանսպորտային միջոցների քանակը զգալիորեն աճել է, ինչը, ըստ գործադիրի, առաջացրել է վերահսկողության և անվտանգության ապահովման լրացուցիչ անհրաժեշտություն։

Կառավարությունն առաջարկում է մոպեդները, տրիցիկլները և կվադրիցիկլները բերել պարտադիր ապահովագրության դաշտ։ Փոփոխություններ են նախատեսվում «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքում։

Ներքին գործերի նախարարի տեղակալ Արմեն Ղազարյանի խոսքով՝ վերջին շրջանում ճանապարհային երթևեկությանը մասնակցող այս տեսակի տրանսպորտային միջոցների քանակը զգալիորեն ավելացել է։

«Երեկվա՝ մարտի 1-ի դրությամբ երկրում հաշվառված է 2․594 երկանիվ մոպեդ, 29 եռանիվ մոպեդ, 127 տրիցիկլ և կվադրիցիկլ»,- նշել է Ղազարյանը։

«Հայաստան» խմբակցության անդամ Գեղամ Մանուկյանին հետաքրքրում էր, թե ինչպես է կատարվելու վերահսկողությունն այս տրանսպորտային միջոցների նկատմամբ։ Պատգամավորը մատնանշում է կոնկրետ դեպքեր, երբ անվտանգության նորմերը չեն պահպանվում։

«Հնդիկների մոպեդների վերահսկողությունը ո՞նց է լինելու»։

Փոխնախարարի խոսքով՝ վերահսկողությունը կատարվելու է այնպես, ինչպես տրանսպորտային այլ միջոցների պարագայում՝ թե՛ տեխնիկական միջոցներով, թե՛ պարեկային ծառայության կողմից։

«Բացի դրանից սահմանվել է պարտադիր հաշվառման պահանջ, և նույնականացումն արվելու է պարտադիր կարգով՝ նույն գործիքակազմով։ Ինչպես այլ տրանսպորտային միջոցների նկատմամբ ենք խստացնում վերահսկողությունը, այնպես էլ դրանց համար են սահմանվելու ԱՊՊԱ պայմանագրեր և պարտադիր ապահովագրության պահանջ»։

ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը մեկ այլ օրինակ բերեց՝ նշելով, որ տրանսպորտային այդ միջոցները հաճախ խախտումներ են կատարում, ստեղծում երթևեկության համար վտանգավոր իրավիճակներ և գտնում են միջոցներ պատասխանատվությունից խուսափելու համար։

«Հնդիկ առաքիչները հարմարվել են մեր իրականությանը։ Որպեսզի խուսափեն պատասխանատվությունից, հետևի համարները ծռում են․ ո՞նց եք կանոնակարգելու»։

«Ընդհանուր առմամբ գործում են նույն կարգավորումները ինչպես բոլոր մեքենաների դեպքում։ Սակայն այս կարգավորումը, որը մենք ընդունում ենք, ևս մեկ խթան է, որպեսզի ոլորտը լիարժեքորեն մտնի վերահսկողության դաշտ»։

Անդրանիկ Քոչարյանն այս համատեքստում խոսում է նաև ինքնագլորների խնդրի մասին։

«Ինքնագլորները վարելու տարածք չունեն, մայթերով են երթևեկում, սաղավարտ չունեն։ Հիմա ավելին՝ երկու հոգով են վարում, կարող է նույնիսկ երրորդը նստել մյուսի ուսերին։ Արագացնում են ընթացքը և հաշվի չեն առնում, որ այդ արագությունը կարող է դառնալ անկառավարելի։ Հնարավոր է՝ երեխա լինի, հնարավոր է՝ չնկատենք, բախվեն և կյանք կորցնեն»։

Նախարարի խոսքով՝  ինքնագլորների ոլորտն ուսումնասիրվում է, և կարգավորումները կներկայացվեն առանձին նախագծով։