Խրախուսել ենք Հայաստանին վերջնական համաձայնության հասնել Ադրբեջանի հետ․ Օ՛ Բրայեն

Բրյուսելում ԱՄՆ պետքարտուղար Էնթոնի Բլինքենի, Եվրոպական հանձնաժողովի նախագահ Ուրսուլա ֆոն դեր Լայենի և վարչապետ Փաշինյանի հանդիպման նպատակն էր օգնել կենտրոնանալ Հայաստանի տնտեսական դիվերսիֆիկացիայի, քաղաքական բարեփոխումների և մարդասիրական օգնություն հատկացնելու վրա։ Այս մասին հայտարարել է ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛ Բրայենը՝ ամփոփելով Հայաստան-ԱՄՆ-ԵՄ բարձր մակարդակի բանակցությունները։

Ամերիկացի դիվանագետն ասել է, որ Բլինկենը, Ֆոն դեր Լայենն ու Բորելն ընդգծել են, որ վճռականորեն աջակցում են Հայաստանի անկախությանը, ինքնիշխանությանը և տարածքային ամբողջականությանը։

«Մենք նաև նշել ենք մեր հիացմունքը 2018 թվականի թավշյա հեղափոխությունից հետո Հայաստանում տեղի ունեցած ժողովրդավարական վերափոխումների վերաբերյալ։ Մենք տեսել ենք էական բարեփոխումներ և ջանքեր՝ կառուցելու համաշխարհային տնտեսություն և քաղաքական համակարգ, որը կարտացոլի Հայաստանի ժողովրդի ժողովրդավարական ձգտումները: Մեր նպատակը դա շարունակելն է։ Մենք նաև գիտենք, որ այս հանդիպումը տեղի է ունենում մի համատեքստում, երբ շարունակական ջանքեր են գործադրվում Հայաստանի և Ադրբեջանի միջև խաղաղ համաձայնագրի ձեռքբերման ուղղությամբ։ Այս հանդիպումը վերաբերում էր Հայաստանում բարեփոխումներին, բայց մենք, անշուշտ, խրախուսեցինք Հայաստանին շարունակել խաղաղության ճանապարհը և փորձել հասնել վերջնական համաձայնության Ադրբեջանի հետ։ Սա տարածաշրջանի համար երկարաժամկետ անվտանգության ապահովման և բարգավաճման զարգացման լավագույն ուղին է, հատկապես նոր առևտրային ուղիները, որոնք կարող են անցնել Միջերկրական ծովից Կենտրոնական Ասիա: Այսպիսով, մենք ողջունում ենք այդ բոլոր քայլերը:

Պետքարտուղար Բլինքենն ընդգծել է, որ առաջընթացը և քաղաքական բարեփոխումները պայմաններ են ստեղծում ներառական կառավարման համար, որը կարձագանքի իր ժողովրդի կամքին և կօգնի բազմազանությանն ու գործընկերությանը ողջ աշխարհում: Մենք կշարունակենք աջակցել Հայաստանի բարեփոխումներին, քանի որ դա անում ենք լայն առումներով։ Ֆինանսական նախորդ տարում մենք տրամադրել ենք 65 միլիոն դոլարի օգնություն, կան որոշակի գումարներ, որոնք ուղղվել են մի շարք ծրագրերի՝ և՛ մարդասիրական, և՛ տնտեսական բարեփոխումների և աջակցության, քանի որ Հայաստանը բարեփոխում է իր վարչական կառույցները և զարգացնում հզոր ապագա:

Հայաստանը ստանձնել է հսկայական պատասխանատվություն՝ աջակցելու 2022 թվականին Ռուսաստանի՝ Ուկրաինայի չարդարացված ներխուժումից հետո եկածներին և Լեռնային Ղարաբաղից տեղափոխված 100 հազար մարդկանց։ Մենք հասկանում ենք, որ Հայաստանի չափերն ունեցող երկրի դեպքում բարեկամների աջակցության կարիքն է զգացվում, որպեսզի աջակցություն ցուցաբերցի այդ մարդկանց ինտեգրմանը, խաղաղ վերադարձի իրավունքին, եթե դա այն է, ինչ նրանք ընտրում են, բայց նաև, որպեսզի Հայաստանը կարողանա ապահովել այնպիսի կյանք, որին մարդիկ արժանի են և ցանկանում են ունենալ ժողովրդավարական, բարգավաճ հասարակությունում»,- հայտարարել է Բլինքենի օգնականը։