Արցախցիների թոշակները որ դադարեցրել եք, բա էդ բյուջեն ի՞նչ է լինելու. Գեղամ Նազարյան (տեսանյութ)

«ՀՀ կառավարության որոշումներին ծանոթանալուց ցավոք այնպիսի տպավորություն է, որ մենք խոսում ենք իքս երկրից եկած իգրեկ ազգությամբ փախստականների մասին։ Իրականում խոսքը մի ժողովրդի մասին է, որն այս իրավիճակում հայտնվել է նաեւ այս կառավարության պոպուլիստական, ուտոպիստական քայլերի ու գործողությունների հետեւանքով»,- Ազգային ժողով-կառավարություն հարցուպատասխանի ժամանակ ասաց «Հայաստան» խմբակցության պատգամավոր Գեղամ Նազարյանը։

Նրա խոսքով՝ այսքանից հետո պետք են ոչ ստանդարտ որոշումներ, արագ քայլեր։ «Այսօր չգիտեմ, թե ամեն մեկս քանի զանգ ստացավ արցախցիներից, թե ինչո՞ւ են իրենց թոշակներն ու կենսաթոշակները դադարեցնում վճարել, իրենք կրկնակի՞ են տուժելու, թե՞ եռակի։ Ասում եք՝ մարդկանց կացարաններով ապահովել ենք, իսկ հետաքրքրվո՞ւմ եք, գնո՞ւմ եք, տեսնո՞ւմ եք՝ ինչ կացարաններում են նրանք։ Ես տեսնելով՝ ամաչում եմ, ցավ եմ ապրում, որ ինքս չեմ կարողանում տեղավորել ավելի լավ կացարաններում։

Այդ մարդիկ դրա՞ն էին արժանի, որ այդքան հերոսական դիմադրության ու պայքարից հետո, 9 ամսվա շրջափակումից հետո իրենց զոռով, քերելով, պոկելով իրենց հողից՝ բերեցին այստեղ։ Ես հասկանում եմ, որ կառավարությունը մտադիր է, բնակարանով ապահովել ինչ-որ ծրագրով, որով արցախցիներն իրենք պետք է վճարեն։ Չեք կարծո՞ւմ, որ ամոթ ու անընդունելի է, երբ մենք արցախցիներին առաջարկենք իրենց գրպանից վճարել իրենց բնակարանների համար։ Եվ ինչո՞ւ պետք է արցախցին այսօր ոչ ստանդարտ եւ նորմայից բարձր վարձակալական գներ վճարի իր ընտանիքն այս կամ այն քաղաքում տեղավորելու համար։ Ես ուզում եմ հասկանալ՝ սկզբունքային որոշումը ո՞րն է՝ արցախցին պետք է վճարի՞ բնակարան ձեռք բերելու համար, թե՞ պետությունն իրոք զգում է, որ պարտք է ու պարտավոր է այս խնդիրները լուծել» ,- հարցրեց Գեղամ Նազարյանը։

Ի պատասխան վարչապետ Նիկոլ Փաշինյանն ասաց, որ Արցախից բռնի տեղահանված 5 հոգանոց ընտանիքն այս պահի դրությամբ ստացել է յուրաքանչյուր անձի համար 100 հազար, այսինքն՝ 500 հազար դրամ։ Դրան գումարած առաջիկա 6 ամսվա համար յուրաքանչյուր անձ ստանալու է 50 հազարական դրամ բնակարանային կարիքները հոգալու համար։ Այսինքն՝ ամիսը 250 հազար դրամ՝ 6 ամսվա ընթացքում 1 մլն 500 հազար դրամ։ Դրան գումարած 5 հոգանոց ընտանիքում առաջիկա երկու ամսվա ընթացքում յուրաքանչյուր անձ կստանա 50 հազարական դրամ՝ հրատապ կարիքները հոգալու համար։ «Այսինքն՝ այս պահի ծրագրերով մենք 5 հոգանոց ընտանիքի օրինակով 2 մլն 500 հազար դրամի աջակցություն ենք տրամադրում ԼՂ-ից բռնի տեղահանված մեր քույրերի եւ եղբայրների համար։

Եթե ընտանիքն ավելի մեծ է, ավելի մեծ գումար կստանա։ Որեւէ մեկին մենք թոշակից չենք զրկել, բայց Հայաստանի Հանրապետության օրենսդրությամբ մենք թոշակ կարող ենք տրամադրել մարդկանց՝ ՀՀ օրենսդրությամբ սահմանված կարգով։ Այն որոշումը, որի մասին ես հիշատակեցի, որը վաղը կայացվելու է, մարդկանց ժամանակավոր պաշտպանության կարգավիճակ/փախստականի կարգավիճակ տալով, այդ թվում՝ նրանց գույքային իրավունքների հետագա հետապնդման եւ պաշտպանության համար կստեղծի իրավական հիմք։ Դրանից հետո նրանք արագացված կարգով կստանան ՀՀ քաղաքացիություն՝ դիմելու պարագայում, որից հետո թոշակավորման եւ մնացած հարցերը շատ արագ կլուծվեն»,- ասաց Փաշինյանը։

Նա հավելեց․ «Դուք ասում եք՝ գնում եք կացարանները տեսնում եք, ամաչում եք, բայց մենք 100 հազար մարդ ենք ընդունել մեկ շաբաթվա ընթացքում։ Եվ այդ կացարաններում հիմա մարդիկ ապրելու անհրաժեշտություն արդեն չունեն, որովհետեւ մենք այս 5 հոգանոց ընտանիքին տվել ենք 500 հազար, գումարած էլի 500 հազար։ Եվ կարծում ենք, որ օբյեկտիվորեն նրանք կարող են ՀՀ-ում բնակարան վարձել։ Չեմ ասում, որ 4 աստղանի հյուրանոցում կբնակվեն, բայց պատշաճ բնակարան կվարձեն»։

Գեղամ Նազարյանն արձագանքեց․ «Այս մարդիկ չեն ասում՝ մեզ գումար տվեք, իրենք հոգով-սրտով փախստականներ չեն, որ լավ կյանքի համար Ստրասբուրգ են գնացել եւ 300 եվրոյի ակնկալիք ունեն։ Այս մարդիկ ուղղակի արժանապատիվ ապրելու պահանջ ունեն։ Իրենք ասում են՝ մենք ուզում ենք հասկանալ՝ Հայաստանում մշտական տուն ունենալու ենք, թե՞ չենք ունենալու։ Պետությունը գիտակցո՞ւմ է, որ ինքը պարտք է այդ մարդկանց եւ պարտավոր է մշտական բնակարանով կամ տնով ապահովել, պետությունը ծրագիր ունի՞ մշակած, թե որ մարզերում է կարելի այդ մարդկանց գայթակղել լավ աշխատանքով, լավ տնով»։

Նիկոլ Փաշինյանը նշեց․ «Մենք նույնքան պարտք ենք ՀՀ այն քաղաքացիներին, ովքեր տուն չունեն, ովքեր պատշաճ կրթություն չեն ստացել։ Ձեզ թվում է, թե լավ բան եք անում, իրականում վատ բան եք անում։ Դուք մի ստեղծեք հակադրություն, որովհետեւ ՀՀ կառավարությունը նույնպիսի պարտավորություն ունի ՀՀ քաղաքացիների նկատմամբ։ Օրինակ՝ սահմանամերձ բնակավայրերում 16 մլն դրամի բնակարանային ծրագիր է իրականացվում, շատ շուտով դա հասանելի կլինի նաեւ ԼՂ-ից բռնի տեղահանված մեր քույրերին ու եղբայրներին։ Ինչ ծրագրեր, որոնք հասանելի են ՀՀ քաղաքացիներին, հասանելի կլինեն նաեւ ԼՂ-ից բռնի տեղահանված մեր քույրերին ու եղբայրներին, առավել եւս, երբ նրանք դիմեն ու ստանան ՀՀ քաղաքացիություն։

Ասում եք՝ այդ մարդիկ հոգով-սրտով փախստական չեն։ Ոչ մեկ էլ հոգով-սրտով փախստական չէ, մարդիկ ինչ-որ քաղաքական հանգամանքների եւ իրավիճակի հետեւանքով են դառնում փախստական։ Հենց առաջին օրից մեր կառավարության եւ իմ դիրքորոշումը եղել է այն, որ մենք այդ մարդկանց չպետք է սեքնդ-հենդ հագուստներ մատակարարենք։ Մենք ասում ենք՝ պետք է գումար վճարենք, իրենք դրա շրջանակներում իրենց կարիքները հոգան։ Որ դուք գնացել եք, այդ կացարանը տեսել եք, որից ամաչում եք, մեր սիրելի հայրենակիցներին ասեք՝ մի մնացեք այլեւս այդ վատ կացարանում, 6 ամսվա ընթացքում կառավարությունը բնակարան վարձելու գումար է տվել։ 100 հազար մարդ ենք ընդունել, այսօր ամբողջ աշխարհը զարմացած է, թե ոնց ենք կարողացել դա անել, դուք ասում եք՝ ամաչում եք կացարանից։ Պետք չէ այդ կացարանում այդ մարդիկ մնան, թող բնակարան վարձեն իրենց հատկացված գումարներով»։