Ո՞վ առաջինը կստանա Neuralink-ի ուղեղի իմպլանտը

Միլիարդատեր Իլոն Մասկին պատկանող Neuralink ստարտափը, որն ուղեղում տեղադրելու նպատակով չիպեր է պատրաստում, նախատեսում է արդեն այս տարի սկսել իր արտադրանքի փորձարկումները մարդկանց վրա: Փարիզում VivaTech միջոցառման ժամանակ Իլոն Մասկը հայտարարել է, որ Neuralink-ի պատրաստած առաջին իմպլանտը կստանա տետրապլեգիայով կամ ստորին վերջույթների կաթվածով հիվանդը։

Վերջերս ընկերությունն ԱՄՆ Սննդամթերքի և դեղերի վարչությունից (FDA) վերջապես թույլտվություն ստացավ մարդկանց վրա փորձարկումներ անելու համար: Սակայն ավելի վաղ նույնիսկ կենդանիների վրա փորձարկումներ անելու առումով նրանց մոտ ամեն ինչ հարթ չէր, և այս թեմայով հետաքննությունները դեռ շարունակվում են: FDA-ը Reuters-ին հաստատել է, որ Neuralink-ը թույլտվություն է ստացել ուղեղի իր իմպլանտը և վիրաբուժական ռոբոտը թեստավորման նպատակով օգտագործելու համար, սակայն այլ մանրամասներ չեն հայտնել:

Եթե ​​Neuralink-ը կարողանա ապացուցել, որ իր մասնագետների մշակված ուղեղի իմպլանտն անվտանգ է մարդկանց համար, ապա դեռ մի քանի տարի կպահանջվի, մինչև ստարտափը ստանա այս սարքի կոմերցիոն օգտագործման թույլտվությունը։

Neuralink-ը մշակում է այսպես կոչված ուղեղ-համակարգիչ ինտերֆեյսի սարքեր (BCI - Brain Computer Interface): Մասկի խոսքով՝ իր ընկերության իմպլանտներն ապագայում կօգնեն անդամալույծ մարդկանց նորից սկսել քայլել, կույրերին՝ տեսնել և ի վերջո մարդկանց կդարձնեն կիբորգի նման մի բան:

Նշենք, որ այսօր կան շատ այլ, քիչ հայտնի ընկերություններ, որոնք նույնպես մշակում կամ արտադրում են նյարդային ակտիվությունը գրանցող կամ խթանող սարքեր՝ այսպես կոչված նեյրոմոդուլյացիայի սարքեր: Այս սարքերի շուկան այժմ գնահատվում է 6 մլրդ դոլար:

FDA-ն արդեն հաստատել է մի քանի այսպիսի սարքեր, այդ թվում՝ նախատեսված Պարկինսոնի հիվանդության, էպիլեպսիայի և օբսեսիվ-կոմպուլսիվ խանգարման բուժման համար: