Նոր ձևավորված բնագծերում բանակցություն ասվածն ինչպե՞ս է լինում. ՊՆ փոխնախարարի մեկնաբանությունը

Որևէ ձևով հնարավոր չէ կանոնակարգել, թե որ պահին կարող է ադրբեջանցիների հետ այս կամ այն հարցի շուրջ բանակցելու անհրաժեշտություն առաջանալ։ Այս մասին, այսօր՝ ապրիլի 12-ին, ԱԺ–ում հայտարարեց պաշտպանության փոխնախարար Արման Սահակյանը` պատասխանելով «Պատիվ ունեմ» խմբակցության պատգամավոր Տիգրան Աբրահամյանի հարցին։

Աբրահամյանը, մասնավորապես, հետաքրքրվել էր, թե նոր ձևավորված բնագծերում բանակցություն ասվածն ինչպե՞ս է կանոնակարգվում, ինչ որոշումների հիման վրա, ո՞վ է լիազորություն տալիս որևէ մեկին բանակցելու ադրբեջանցիների հետ և դեպի հայկական դիրքերին մոտեցող ադրբեջանցիների վրա կրակ չբացելու համար։

Ի պատասխան ՊՆ փոխնախարարն ասաց. «Եթե տեղի են ունենում բանակցություններ որևէ տեղում, որպես կանոն, դա տեղի է ունենում հրամանատարների միջոցով` ներքին պայմանավորվածությունների հիման վրա։ Բանակցություն ասածը լայն հասկացություն է, փոքր հարցի շուրջ անգամ պայմանավորվածությունը բանակցության ձև է։ Որպես կանոն, տեղում լինում են սպաներ, որոնք դժվար իրավիճակներում օպերատիվ լուծումներ են գտնում, բնականաբար, շատ հաճախ իրենց հրամանատարների հետ ճշգրտելուց հետո»,–ասաց Սարգսյանը։

Իսկ թե ո՞վ է որոշում սահմանը, ապա Սարգսյանը հիշեցրեց, որ կա համապատասխան հանձնաժողով Հայաստանի և Ադրբեջանի կողմից ստեղծված, որոնք սահմանազատման հարցերով են զբաղվում և համապարփակ լուծումներ են տալու։ «Բայց տեղային վեճերը, որոնք երբեմն ծագում են ներկայացված քարտեզների և այլ պնդումների միջոցով, դրանք լուծվում են հենց տեղում` բանակցության, պայմանավորվածությունների, զրույցների միջոցով: Տեղում իրավիճակ է լինում, որ թեկուզ փոքր հրամանատարն արձագանքում է և չի թողնում, որ փոքր խնդիրը վերածվի մեծ բախման»,-ասաց Արման Սահակյանը:

Տիգրան Աբրահամյանը նկատեց, որ երբ մարտական հենակետի վրա ադրբեջանցի զինծառայողներ են գալիս, կանոնագիրքը լրիվ այլ բան է սահմանում. «Այս դեպքում գործընթաց է եղել, որի հետեւանքով անհրաժեշտ միջոցառումներ չեն իրականացվել եւ բանակցությունների տապալման, դրանց չկանոնակարգված լինելու հետեւանքով 4 զինծառայող է զոհվել»,-ասաց նա:

Արման Սահակյանը չհամաձայնեց ընդդիմադիր պատգամավորի հետ. «Երեկվա դեպքը բանակցությունների կամ բանակցությունների բացակայության պատճառով չի տեղի ունեցել, այլ ադրբեջանցիների կողմից կոնկրետ սադրանք է տեղի ունեցել»,–ասաց նա։