Դատարանը բավարարել է «Հ2» հեռուստաալիքի հայցը. ՀՌՀ-ն նոր մրցույթ է հայտարարել

Դատավոր Ալեքսանդրա Հարությունյանը վճռել է «Հայկական երկրորդ հեռուստաալիք» ՍՊԸ-ի հայցը բավարարել՝ անվավեր ճանաչել ՀՀ հեռուստատեսության և ռադիոյի հանձնաժողովի 04.06.2021թ. «Հանրային մուլտիպլեքսում սլոթի օգտագործման լիցենզավորման մայրաքաղաքային սփռման մրցույթի հաղթող ճանաչելու և լիցենզիա տրամադրելու մասին» թիվ 93-Ա որոշումը:

Սույն որոշումը ՀՌՀ-ն և Հայաստանի հանրային հեռուստաընկերությունը բողոքարկել են նախ վերաքննիչ վարչական դատարան, ապա նաև Վճռաբեկ դատարան, սակայն Վերաքննիչը անփոփոխ է թողել դատարանի որոշումը, իսկ Վճռաբեկը մերժել է վարույթ ընդունել բողոքը, ինչը նշանակում է, որ դատական պրոցեսն ավարտվել է և սկզբնական վճիռը մտել է ուժի մեջ, այսինքն՝ անվավեր է ճանաչվել ՀՌՀ որոշումը։

Այս որոշումը վերաբերում է հետևյալին. Հանրային մուլտիպլեքսում սլոթի օգտագործման լիցենզավորման մայրաքաղաքային սփռման մրցույթին մասնակցելու համար 2021 թվականի ապրիլի 4-ին ՀՌՀ հայտեր էին ներկայացրել «Փաստինֆո» ՍՊԸ-ն, «Հայկական երկրորդ հեռուստաալիք» ՍՊԸ-ն և «Հայաստանի հանրային հեռուստաընկերություն» ՓԲԸ-ն:

ՀՌՀ-ն հունիսի 4-ի իր որոշմամբ մրցույթում հաղթող էր ճանաչել «Հայաստանի հանրային հեռուստաընկերություն» ՓԲ ընկերությանը և նրանց տրամադրել է Երևան քաղաքի տարածքում հանրային մուլտիպլեքսում սլոթի օգտագործման լիցենզիա:

Հիմք ընդունելով վարչական դատարանի 2021 թվականի օգոստոսի 25-ի վճիռը` Հեռուստատեսության և ռադիոյի հանձնաժողովը հայտարարել է հանրային մուլտիպլեքսում սլոթի օգտագործման լիցենզավորման մայրաքաղաքային սփռման մրցույթ:

Նկատենք, որ այս որոշումը չի վերաբերում Հեռուստատեսության և ռադիոյի հանձնաժողովի 2021 թվականի հունվարի 15-ի որոշմանը, որով Հայկական երկրորդ հեռուստաալիքը զրկվել էր վերգետնյա եթերային հեռարձակում իրականացնելու հնարավորությունից, ինչի համար ևս դատի էր տվել ՀՌՀ-ին:

ՀՌՀ հունվարի 15-ի որոշմամբ Հանրապետական սփռման 5 սլոթերի համար առավելագույն միավոր էին հավաքել և հեռարձակման իրավունք էին ստացել «Արմենիա TV»-ն, «Երկիր մեդիա»-ն, «Շանթ» ՍՊԸ-ն, ATV-ն և «Կենտրոն TV»-ն։

Իսկ ահա հանրապետական սփռման ալիքների շարքից դուրս էին մնացել «5-րդ ալիքը», «Հայկական երկրորդ հեռուստաալիքը», «Արմնյուզ»-ը, «Ա1+»-ը և Freenews ՍՊԸ լրատվական կայքը: