«Շիշ բռնող» մականունով պատգամավոր Հայկ Սարգսյանի անվան հետ կապվող «White Shorja» լողափը՝ հերթական կոռուպցիոն սկանդալում

Aravot.am-ի տեղեկություններով` ապրիլի 6-ին ՀՀ ոստիկանության Գեղարքունիքի մարզային վարչությունից ստացվել է գրությունը ՀՀ քր.դատ. օր. 180-181 հոդ. սահմանված կարգով նյութեր նախապատրաստելու համար: Ըստ ՀՀ ԱԱԾ Գեղարքունիքի մարզային վարչության գրության Շողակաթ համայնքի ղեկավարը Սևանա լճի առափնյա հատվածում գործող «White Shorja» հանգստյան գոտու վարձակալ Ա. Մ.-ին 2020թ. հուլիսին տրամադրել է կեղծ տեղեկանք այն մասին, որ նշված հանգստյան գոտին գտնվում է Շողակաթ համայնքի վարչական տարածքում, մինչդեռ այն գտնվում է Սևան ազգային պարկի տարածքում: Ա.Մ.-ն տեղեկանքը ներկայացրել է ՀԷՑ-ի Գեղամա մասնաճյուղ, վճարել է 203. 000 դրամ «Սպիտակ Շորժա» հանգստյան գոտու էլեկտրամատակարարման ցանցը Ճամբարակի էլ.ցանցի ուժերով կառուցելու համար, սակայն ըստ համապատասխան կարգի` վարձակալը պետք է վճարեր 846.000 դրամ, կամ ՀԷՑ-ից ստանար տեխնիկական պայմանի թույլտվություն և էլեկտրամատակարարման ցանցը կառուցեր սեփական միջոցներով:

Դեռևս կորոնավիրուսային համավարակի և արտակարգ դրության ժամանակահատվածում հայտնի դարձավ, որ «Շիշ բռնող» մականունով պատգամավոր Հայկ Սարգսյանի անվան հետ կապվող «White Shorja» լողափում երեկույթ էր կազմակերպվել` խախտելով հակահամաճարակային կանոնները: Այդ ժամանակ Հայկ Սարգսյանը մասնակցել էր հավաքույթին, իսկ Հայկ Սարգսյանի ընկերը` Արտյոմ Մելքումյանը, որին, ըստ Aravot.am-ի տեղեկությունների, կեղծ տեղեկանք է դրամադրվել, այդպես էլ չէր կարողացել պատշաճ բացատրություն տալ հավաքույթի կազմակերպման վերաբերյալ:

Այս ընկերության կոռուպցիոն հարցերի մեջ ներգրավվածության վերաբերյալ բազմաթիվ հրապարակումներ կան: AntiFake.am-ը գրել էր, որ «White Shorja» լողափի սպիտակ վրանները պատկանում են պետական միջոցառումներից միլիոնավոր դրամներ ստացած «EX production»-ին, որի տնօրենը Հայկ և Նաիրի Սարգսյանների ընկերն է և հանդիսանում է իշխանությունների կողմից կազմակերպվող միջոցառումների հիմնական սպասարկողներից մեկը: