Ժուռնալիստների միություն. Ավտորիտարիզմի ճանապարհին իշխանություններին խանգարում են ԶԼՄ-ները

Հայաստանի իշխանությունները հաստատուն քայլերով մոտենում են ավտորիտարիզմին, եւ այդ ճանապարհին նրանց խանգարում են ԶԼՄ-ներն ու խոսքի ազատությունը։ Այս մասին մարտի 1-ի քննարկման ժամանակ ասել է Հայաստանի ժուռնալիստների միության նախագահ Սաթիկ Սեյրանյանը։

Նրա համոզմամբ՝ իշխանությունները կանգ չեն առնելու, նրանք ամեն օր նոր նախագծեր են նախաձեռնում։ Սեյրանյանը նշել է, որ Սահմանադրական դատարանը անցել է իշխանությունների վերահսկողության տակ, իսկ հիմա վերջինները փորձում են իրենց ենթարկեցնել ամբողջ դատական համակարգը։

«Մեզ՝ լրագրողներիս, մնում է միավորվել եւ խոսել մեր խնդիրների մասին։ Հասարակությունն ինքը պետք է պաշտպանի ԶԼՄ-ները, որոնց կհաջողվի կատարել իրենց գործառույթն ու ինչ-որ աստիճանով հանդես գալ իշխանության հակակշռի դերում»,- նշել է ՀԺՄ ղեկավարը։

ԶԼՄ-ների հանդեպ վերաբերմունքը հասարակությունում, նրա գնահատմամբ, փոքր-ինչ փոխվել է, չնայած այն բանին, որ իշխանություններն ու քաղաքացիական հասարակության մի հատվածը թիրախավորել է նրանց՝ դա փաստարկելով նրանով, թե, իբր, նրանք իշխանություններին խանգարում են աշխատել։

Սաթիկ Սեյրանյանը նշել է, որ բոլոր ժամանակներում իշխանությունները չեն սիրել ԶԼՄ-ներին, բայց այսօր զանգվածային լրատվամիջոցները հայտարարվել են դասային թշնամիներ։ «ԶԼՄ-ների համար, որոնք այսօր դարձել են ժողովրդավարության պաշտպաններ, շատ դժվար է աշխատել նման պայմաններում։ Լրագրողների հարցումներին կամ չեն պատասխանում, կամ անգամ ենթարկում են բռնության»,- ավելացրել է Սեյրանյանը։

Նրա կարծիքով՝ հասարակությունում լուրջ անվստահություն կա պետական կառույցների տարածած տեղեկատվության հանդեպ։ «Սա լուրջ մարտահրավեր է, քանի որ շատերը պետությունն ասոցիացնում են գործող իշխանությունների հետ։ 44-օրյա պատերազմից հետո էլ ավելի խորացած անվստահությունը պաշտոնական տեղեկատվության հանդեպ հանգեցրել է պետության նկատմամբ վստահության լուրջ անկման։ Իշխանություններն ամեն օր ստել են մարդկանց, որոնք նոյեմբերի 10-ին վերադարձել են այլ իրականություն»,- փաստել է Սաթիկ Սեյրանյանը։