Խորվաթ մրցավարները կսպասարկեն Հայաստան - Լիխտենշտեյն հանդիպումը

Ֆուտբոլի Հայաստանի և Լիխտենշտեյնի հավաքականների միջև աշխարհի առաջնության ընտրական փուլի եվրոպական գոտու մրցաշարի J խմբի 6-րդ տուրի հանդիպումը կսպասարկեն խորվաթ մրցավարներ, hաղորդում է ՈւԵՖԱ-ի մամուլի ծառայությունը:

Սեպտեմբերի 8-ին Վազգեն Սարգսյանի անվան «Հանրապետական» ստադիոնում անցկացվելիք հանդիպման գլխավոր մրցավար է նշանակվել 37-ամյա Դույե Ստրուկանը, որին եզրերում կօգնեն Գորան Պերիչան ու Մարյան Տոմասը:

Խորվաթիայի առաջնության խաղեր սպասարկող Դույե Ստրուկանն աշխատել է նաև եվրագավաթային հանդիպումներում:

Հիշեցնենք, որ ԱԱ-2022-ի ընտրական փուլի նախորդ 5 տուրերում Հայաստանի հավաքականը հաղթել է Լիխտենշտեյնին (1:0), Իսլանդիային (2:0), Ռումինիային (3:2), գոլազուրկ ոչ ոքի խաղացել Հյուսիսային Մակեդոնիայի հետ, պարտվել Գերմանիային (0:6) և 10 միավորով երկրորդն է J խմբում: Առաջատար Գերմանիան ունի 12 միավոր, Ռումինիան՝ 9, Հյուսիսային Մակեդոնիան՝ 8, Իսլանդիան՝ 4, իսկ Լիխտենշտեյնը կրել է 5 պարտություն: