Մեծ անակնկալ. Ադրբեջանը վաստակեց առաջին միավորը

Ֆուտբոլի աշխարհի առաջնության ընտրական փուլի հերթական տուրում A խմբում ընդգրկված Ադրբեջանի հավաքականը մեծ անակնկալ մատուցեց, մրցակցի դաշտում 1:1 ավարտելով հանդիպումը Իռլանդիայի ընտրանու հետ: Սա Ադրբեջանի առաջին միավորն էր այս ընտրական փուլում:

Այս խմբի մյուս խաղում սերբերն առանց դժշվարության 4:1 հաշվով հաղթեցին Լյուքսեմբուրգին:

Չորս խաղից հետո Սերբիայի եւ Պորտուգալիայի հավաքականներն ունեն տասական միավոր:

D խմբում ֆինները մեծ ջանքեր գործադրելով 1:0 հաշվով հաղթեցին ղազախներին, իսկ ուկրաինացիները հինգերորդ ոչ-ոքին կերտեցին, այս անգամ Կիեւում 1:1 հաշվով ավարտելով հանդիպումը աշխարհի չեմպիոն Ֆրանսիայի հետ:

Ֆրանսիացիները հինգ խաղից հետո 9 միավորով առաջին տեղում են, իսկ ֆինները երեք խաղից հետո ունեն 5 միավոր: Նույնքան ունեն նաեւ ուկրաինացիները, բայց հինգ խաղից հետո: 

F խմբում Դանիան, պայմանական ասած, մրցակցի դաշտում 1:0 հաշվով հաղթեցին Ֆարերներին: Պայմանական, քանի որ Ֆարերյան կղզիները պատկանում են Դանիայի Թագավորությանը: 

Իսրայելը, շատերի համար անսպասելիորեն, 5:2 հաշվով հաղթեց Ավստրիայի հավաքականին: Շոտլանդիան իր հերթին 1:0 հաշվով հաղթեց Մոլդովային:

Դանիան հինգ խաղից հետո 100 տոկոսանոց արդյունքով առաջին տեղում է, իսկ Իսրայելի հավաքականն առաջատարիօց հետ է մնում հինգ միավորով: Շոտլանդիան ունի ութ, իսկ Ավստրիան՝ յոթ միավոր:

G խմբում Նորվեգիան մրցակցի դաշտում 2:0 հաշվով հաղթեց Լատվիային, Թուրքիան, նույնպես մրցակցի դաշտում 3:0 հաշվով հաղթեց Ջիբրալթարին, իսկ Նիդերլանդների ընտրանին 4:0 հաշվով առավելության հասավ Չեռնոգորիայի նկատմամբ:

Հինգ խաղից հետո Թուրքիան ունի 11, իսկ Նիդերլանդներն ու Նորվեգիան՝ 10-ական միավոր: 

Ընտրական խմբերից ամենաթույլում՝ H խմբում Կիպրոսը տանը 2:0 հաշվով պարտվեց Ռուսաստանի ընտրանուց, Սլովենիան մի կերպ հաղթեց Մալթային՝ 1:0 հաշվով, իսկ խորվաթները մրցակցի դաշտում 1:0 հաշվով հաղթեցին Սլովակիային:

Ռուսաստանի եւ Խորվաթիայի հավաքականները տասը միավորով կիսում են առաջին տեղը:

Top-News.am