Ոչ թե բարեկամի մոտ է գերի ընկել, այլ հակառակորդի, պետք է հասկանանք, թե ինչ կարող ենք անել. Փաշինյանը՝ ադրբեջանական գերության մեջ հայտնված Նարեկի կնոջը (տեսանյութ)

Այսօր ՀՀ վարչապետ Նիկոլ Փաշինյանն այցելել էր Սյունիքի մարզի Խնձորեսկ համայնք՝ մասնակցելու Սպարապետի օրվան նվիրված միջոցառմանը: Միջոցառման ընթացքում վարչապետին մոտեցավ ադրբեջանական գերության մեջ հայտնված, Ներքին Խնձորեսկ գյուղի բնակիչ Նարեկ Սարդարյանի կինը:

Կինը ցանկացավ տեղեկանալ, թե ինչ նորություն կա իր ամուսնուց, քանի որ որևէ տեղեկություն չունի: Փաշինյանը պատասխանեց. «Ցավոք սրտի, ոչինչ չեմ կարող ասել, գիտեք՝ դժբախտաբար, ոչ թե բարեկամի մոտ է ընկել, այլ հակառակորդի: Պետք է հասկանանք, թե ինչ կարող ենք անել»:

Պաշտպանության նախարար Դավիթ Տոնոյանը Նիկոլ Փաշինյանին ասաց, որ ինքը կխոսի Նարեկ Սարդարյանի կնոջ հետ:

Հիշեցնենք, որ ԱԱԾ լրատվության ծառայությունը հայտնել էր, որ 2020 թ. հուլիսի 8-ին՝ ժամը 11:00-12:00-ի սահմաններում, ԱՀ Նախիջևանի Ինքնավար Հանրապետության հետ սահմանակից ՀՀ Սյունիքի մարզի Գորայք համայնքի վարչական տարածքի արոտավայրերում սեփական անասուններն արածացնելիս անհետ կորել է Սյունիքի մարզի Ներքին Խնձորեսկ գյուղի բնակիչ, 1990 թ. ծնված ՀՀ քաղաքացի Նարեկ Սարդարյանը:

Պարզվել է, որ Նարեկ Սարդարյանը կորած անասունները որոնելու արդյունքում մոլորվել և անցել է ԱՀ Նախիջևանի տարածք, որտեղ գերեվարվել է: Ն.Սարդարյանը բնութագրվում է որպես հայրենասեր, հանգիստ և աշխատասեր անձնավորություն, տեղական ինքնակառավարման և իրավապահ մարմինների հետ երբևիցե խնդիր չի ունեցել:

Ն.Սարդարյանն ունի ընտանիք և անչափահաս երեխաներ, որոնց հոգսերը հոգում է ինքը: Այժմ միջոցներ են ձեռնարկվում նրան Հայաստան վերադարձնելու համար:

Մանրամասները՝ տեսանյութում։