Սուպերմարկետները հրաժարվում են գյուղացուց անասունի միս գնել. Գյուղացիները բողոքում են կառավարության դիմաց
Գյուղացիները այսօր՝ հուլիսի 6-ին կառավարության դիմաց բողոքի ցույց են անցկացնում՝ ահազանգելով, որ սուպերմարկետները հրաժարվում են գնել անասունների միսը՝ պատճառաբանելով, որ նախորդ 2 տոկոսի փոխարեն 20 տոկոս ավելացված արժեքի պատճառով միսը չեն կարողանում վաճառել։
«Եթե սուպերմարկետները շարունակեն գյուղացուց չընդունել անասունների միսը, վտանգ կա, որ մոտավորապես 4 000 հոգի կմնա առանց գործ»,–նշում են նրանք։
Ցուցարարների կարծիքով, ՀՀ վարչապետ Նիկոլ Փաշինյանը տեղյակ չի խնդրից. «Օրենքով գյուղմթերքն ազատված է բոլոր հարկերից, իսկ վերջերս մեզ ասում են, որ պետք է ձեր միսը ավելացված արժեքի պատճառով թանկ ծախենք։ Եվ, ի վերջո, միսը դրսից են բերում։ Բայց մենք վարկ ենք վերցրել, առել, պահել ենք անասուններին։ Եթե այս հարցը չլուծվի, ոչ ոք անասուն չի պահի։ Ձեռներս ջարդեն, հորթ չեմ առնի, պահեմ»,–նշեց նրանցից մեկը։
«Նոր Զովք» սուպերմարկետի մսավաճառն, իր հերթին, տարակուսանք հայտնեց ներմուծվող մսի որակի առումով. «Եթե դրսից միսը գալիս է եւ վաճառվում է 2400 դրամով, ապա համոզված եմ, որ դրսում այն 2 դոլար է, որը, գուցե, այնտեղ տալիս են իրենց շներին։ Բոլոր հաճախորդները նախընտրում են տեղական միսը։ Տեղական միսը եթե 4000–ով էլ դնեն, միեւնույնն է, տեղական միս են առնելու։ Նույնիսկ աղքատները կգան 100 դրամի ոսկոր կառնեն, բայց կիմանան տեղական մսի ջուրն է։ Իսկ բելառուսական, ղրղզական կամ Դաղստանից բերված միսը ուտելու չի»։
Ցուցարարները շեշտեցին, որ իրենց նպատակը «թանկով» միս վաճառելը չէ. «Ես պատրաստ եմ միսը էժան տալ սուպերմարկետին, բայց սուպերմարկետն էլ պետք է պարտավորվի այն էժան ծախել։ Եթե ես միսը հանձնում եմ 2500 կամ 2550 դրամով, թող դրանից էժան վաճառեն ժողովրդին։ Եթե այս հարցը չլուծվի, 2000 մսավաճառ կմնա առանց գործի»,–նշեց ցուցարարներից մեկը։
Գյուղատնտեսության նախարարի այն հայտարարությունը, որ մսավաճառները 2000 դրամով միսը գնում են եւ 4000–ով վաճառում, ցուցարարները դժգոհությամբ արձագանքեցին եւ հերքեցին. «Աբսուրդ է, որ գյուղատնտեսության նախարարը չգիտի մսի «օպտավոյ» գինը եւ վաճառվող գինը։ 2550–ով առել են, 2950–ով ծախել են»։
Գյուղացիները համոզված են, որ հարցին լուծում կտրվի, բայց խնդրում են, որ այն մեկ օր առաջ լուծվի, քանի որ միսը մի քանի օրից ավելի չեն կարող պահել։