Վարչապետին զայրացրեց Մեղրիի մաքսային անցակետի տարածքի անբարեկարգ լինելը

Նիկոլ Փաշինյանը Սյունիքի մարզի Մեղրի համայնք այցելության ժամանակ եղավ նաև «Մեղրի» ազատ տնտեսական գոտում: ԱՏԳ–ի տնօրեն Աշոտ Զարբաբյանը վարչապետին ծանոթացրեց գոտու շինության, ենթակառուցվածքների, այստեղ ներդրումներ անել ցանկացողների համար առաջարկվող պայմանների հետ:

Լրագրողների հետ զրույցում խոսելով կառույցի նշանակության մասին՝ Նիկոլ Փաշինյանը նշեց․ «Բոլորս էլ հասկանում ենք, որ հարկային որոշակի արտոնություններով աշխատելու տեղ է տրամադրվում: Բայց հասկանում ենք, որ նաև որոշակի խնդիրներ կան տարածքի հետ կապված: Եթե ներդրողները գան՝ պետք է այդ հողի հարցը լուծենք: Այլ բարդություններ էլ կան»,- ասաց նա:

Նիկոլ Փաշինյանն ազատ տնտեսական գոտուց Մեղրիում եղած մաքսային գոտի ոտքով շարժվելիս նաև նկատեց՝ ճանապարհները, տարածքը բարեկարգված չեն: «Կիսավայրենի տարածք է»,- ասաց նա՝ նշելով, որ չի կարծում, թե միջոցներ չեն եղել դրանք բարեկարգելու համար:

Փաշինյանը հանդիմանեց՝ տարածքը չի մաքրվում: «Պետության մասին առաջին տպավորությունն է ստեղծվում»:

Հետո մոտեցավ այնտեղ տեղադրված աղբամաններից մեկին և ասաց․ «21-րդ դարում ենք, սա աղբամա՞ն է: Մաքսայինը հնարավորություն չունի՞ տասը աղբաման շարելու այստեղ: Հիմա գնանք մաքսայինի ունեցվածքը նայենք, տեսնենք իրենց բակում նման «բոչկա» կա՞ դրված: Իրենց հյուրերին այդպե՞ս են ընդունում,- ասաց վարչապետը, հետո ավելացրեց,- ոնց որ 19-րդ դարի վերջ, 20-րդ դարի սկիզբ լինի»:

Այնուհետև նա այցելեց Մեղրիում եղած սահմանային անցակետ, որտեղ նրան այստեղի աշխատակիցները ծանոթացրին պայմանների, այստեղ եղած խնդիրների հետ: