Սևանի դատարանի մոտ փոխմարզպետի որդու սպանության մեջ մեղադրվողի բարեկամը կրակել է սպանվողի ազգականի վրա

Սևանի դատարանի մոտ, որտեղ ընթանում է Գեղարքունիքի փոխմարզպետ Անդրանիկ Հակոբյանի միակ որդու՝ Հայկ Հակոբյանի սպանության գործով դատավարությունը, կրակոցներ են հնչել։

ՀՀ ոստիկանության ԶԼՄ-ների հետ կապի բաժնից հայտնեցին, որ ահազանգ ստացվել է:

«Ոստիկանությունում ահազանգ է ստացվել, որ կրակոցներ են հնչել: Այս պահին դեպքի վայրում աշխատում են իրավապահները»,- ասաց բաժնի պետ Զարզանդ Գաբրիելյանը:

Tert.am-ի հետ զրույցում Հայկ Հակոբյանի իրավահաջորդի ներկայացուցիչ փաստաբան Հովսեփ Սարգսյանն ասաց, որ կրակոցների հետևանքով տուժել է մեկ քաղաքացի՝ Հակոբյանի հորեղբայր Ռաֆիկ Հակոբյանը:

«Դատարան են եկել երկու մեքենա, ըստ ականատեսների՝ «Նիվա» և «Միցուբիշի» մակնիշի մեքենաներ: Իջել են մարդիկ, ըստ Անդրանիկ Հակոբյանի՝ մեքենաներից իջել են Հայկասար Հակոբյանը, որը գործով սպանության մեջ մեղադրվող Մեխակ Հարությունյանի մայրական պապն է, մյուսը եղել է ամբաստանվողի քեռին և ևս երկու հոգի՝ Գևորգ Գուգոյանը, ով Հայկասար Հակոբյանի վարորդն է և Արտակ Խաչատրյանը՝ Հայկասար Հակոբյանի եղբոր փեսան»,- ասաց տուժողի իրավահաջորդի ներկայացուցիչը:

Նա ասաց, որ տուժողը վիրավոր է ծնկի հատվածից, նրան Սևանի հիվանդանոցից տեղափոխել են Երևան, վիճակը ծանր է: Հովսեփ Սարգսյանը հայտնեց, որ բոլորը, ովքեր եկել են դատարանի շենքի մոտ, Նորատուս գյուղի բնակիչներ են:

Պաշտպանը հայտնեց, որ այդ ամենը տևել է ավելիր քան տասը րոպե, Հայկասար Հակոբյանը սպառնացել է սպանել սպանվածի հարազատներին և հեռանալու ժամանակ մեքենաներից մեկից կրակել է Ռաֆիկ Հակոբյանի ուղղությամբ:

Հիշեցնենք, որ դատարանում քննվում է Գեղարքունիքի փոխմարզպետի որդու սպանության գործը, գործով մեղադրյալը Մեխակ Հարությունյանն է: Ըստ մեղադրանքի՝ Մեխակ Հարությունյանը ապօրինի կերպով ձեռք է բերել, պահել և կրել է ռազմամթերք հանդիսացող 48 ատրճանակային փամփուշտներ և գործարանային արտադրության մարտական ակոսափող հրազեն հանդիսացող 9 մմ տրամաչափի ԻԲ 6528 համարի Մակարով տեսակի ատրճանակ, որից արձակված 7 կրակոցներով 2017թ. հունվարի 7-ին՝ ժամը 12.20-ի սահմաններում, սպանել է Հայկ Անդրանիկի Հակոբյանին: