Հայաստանում կրթության վրա ծախսում են ՀՆԱ 2,3 տոկոսը
2017 թվականի տվյալներով՝ Հայաստանում կրթության վրա ծախսում են ՀՆԱ 2,3 տոկոսը: Աշխարհում կրթական ծախսերը միջինը կազմում են ՀՆԱ 4,9 տոկոսը, մինչդեռ խորհուրդ տրվող նորման է 4-6 տոկոսը: Այս մասին հունիսի 1-ին լրագրողների հետ հանդիպման ժամանակ ասաց ՄԱԿ Մանկական հիմնադրամի (ՅՈՒՆԻՍԵՖ) հայաստանյան ներկայացուցիչ Տանյա Ռադոչայը:
Նա ընդգծեց, որ երկրի ապագան կախված է նրանից, թե երկիրն այսօր որքան է ծախսում առողջապահության, կրթության եւ սոցիալական ոլորտի վրա, ուստի այս ոլորտները ոչ մի դեպքում չի կարելի անտեսել:
«Երեխաների հանդեպ մեր սիրո աստիճանը կարելի գնահատել նրանով, թե որքան ներդրում ենք կատարում: Մենք պետք է սկսենք ավելի շատ ներդնել սեցիալական ոլորտում հանուն մեր երեխաների ապագայի: Այն բանից, թե որքան ենք ներդնում առողջապահության, սոցիալական ոլորտում եւ կրթության մեջ, կախված է նաեւ երկրի ապագան»,- նշեց մասնագետը:
Համեմատության համար՝ Վրաստանում կրթության վրա ծախսում են ՀՆԱ 3,8 տոկոսը (2016 թվական), Պակիստանում՝ 2,8 տոկոսը (2017 թվական), Ադրբեջանում՝ 3 տոկոսը (2015 թվական), Թուրքիայում՝ 4,4 տոկոսը (2014 թվական), Հոնկոնգում՝ 3,3 տոկոսը (2017 թվական), Չինաստանում՝ 4 տոկոսից ավելի (2016 թվական), Լիտվայում՝ 4,5 տոկոսը (2016 թվական), Մեծ Բրիտանիայում՝ 5,6 տոկոսը (2015 թվական):