Ինչպես է գլխատվել փարավոնը. բացահայտվել է Թութանհամոնի դամբարանի բացման գաղտնի պատմությունը

Հարյուր տարի է անցել Եգիպտոսում Թութանհամոնի դամբարանի հայտնաբերումից, և այժմ հետազոտողները բացահայտում են պեղումների քիչ հայտնի և բավականին մռայլ մանրամասներ, հաղորդում է Daily Mail-ը։

Բրիտանացի հնագետ Հովարդ Քարթերը և եգիպտացի աշխատողները հայտնաբերել են հայտնի դամբարանը Թագավորների հովտում։ Սակայն, մումիաները սարկոֆագից հանելու համար նրանք ստիպված են եղել գլխատել և մասնատել երիտասարդ փարավոնի մարմինը։ Մումիան ամուր «կպցրած» է եղել դագաղին հին խեժով, որը առատորեն լցրել էին դրա վրա մ.թ.ա. 1323 թվականին թաղման ժամանակ։

Չնայած Քարթերը հետագայում գրել է երեք հատորանոց ուսումնասիրություն հայտնագործության մասին, նա բաց է թողել մարմնի հեռացման բարբարոսական մանրամասները։ Բիրմինգհեմի համալսարանի հետազոտող Էլեոնոր Դոբսոնը նշում է, որ վերջնական «դիահերձումը» իսկապես ավերիչ էր. գլուխը կտրվել էր իրանից, ձեռքերը՝ ուսերին, արմունկներին և դաստակներին, իսկ ոտքերը՝ կոնքին, ծնկներին և կոճերին։ Մարմինը հետագայում բառացիորեն սոսնձվել է՝ ամբողջականության պատրանք ստեղծելու և վնասը թաքցնելու համար։

Այս բացահայտումները վերստին բորբոքեցին հետաքրքրությունը «Փարավոնի անեծքի» լեգենդի նկատմամբ, որը ենթադրաբար հետապնդում էր բոլոր նրանց, ովքեր խանգարում էին դամբարանին։ Լորդ Կարնարվոնը, որը ֆինանսավորել էր արշավախումբը, մահացավ պեղումներից կարճ ժամանակ անց, և մյուս մասնակիցների տարօրինակ մահերը միայն ամրապնդեցին առասպելը։ Սակայն իրական պատմությունը շատ ավելի քիչ միստիկ էր և զգալիորեն ավելի դաժան։

Արխիվները ցույց են տալիս, որ հազարավոր տարիների ընթացքում բրածոացված խեժը դիմադրել է ինչպես կիզիչ արևին, այնպես էլ այն հալեցնելու համար օգտագործվող լամպերին։ Վերջիվերջո, Քարթերը, անատոմներ Դուգլաս Դերին և Սալեհ բեյ Համդին տաքացրել են դանակները մինչև դրանք շիկանալը և բառացիորեն կտրել մումիաները։ Սկզբում նրանք հանել են ոսկե դիմակը, ապա կտրել գլուխը, սղոցել իրանը և կոտրել վերջույթները յուրաքանչյուր հոդի մոտ։ Այս ամենը արվել է ոչ միայն մարմինը, այլև թաղման զարդերը հանելու համար, որոնք ամուր ամրացված էին խեժի մեջ։

Տարիներ անց պարզվել է, որ յուրաքանչյուր հատված պատվել է տաք պարաֆինով, ապա կրկին միացվել է խեժով՝ ցուցադրելու համար։ Դոբսոնը ընդգծում է, որ այսօր կարևոր է վերանայել Քարթերի ժառանգությունը՝ ոչ միայն որպես մեծ հնագետի, այլև որպես մարդու, որի մեթոդները խորապես խնդրահարույց են։ Այնուամենայնիվ, այլ գիտնականներ, այդ թվում՝ Աիդան Դոդսոնը, կարծում են, որ 1920-ականների պայմաններում Քարթերը պարզապես այլ ընտրություն չուներ։