Ինչպե՞ս են առաջացել 2017-ի փոթորիկները (Տեսանյութ)
2017 թվականն աչքի ընկավ փոթորիկների ռեկորդային քանակով, որոնց հետեւանքները որոշ երկրներ դեռ չեն էլ հաղթահարել։ Գլոբալ տաքացումը, մթնոլորտի աղտոտումը, Համաշխարհային օվկիանոսի մակարդակի բարձրացումը եւ այլ գործոններ ազդում են մերձարեւադարձային ցիկլոնների շարժի ուղղության վրա, փոխանցում է Nat-geo–ն։
Այդ գործոնների ուսումնասիրությունը թույլ է տալիս կանխատեսել ուժեղ փոթորիկների եւ մրրիկների առաջացումը։ Քամու հետագծին կարելի է հետեւել, օրինակ, փոշեհատիկների եւ աերոզոլների մասնիկների շարժի միջոցով։
Վերջերս NASA–ն տեսանյութ էր հրապարակել՝ ստեղծված նման մոդելավորման հիման վրա։ Այն պատկերում է 2017-ի հուլիսի 31-ից նոյեմբերի 1-ն ընկած ժամանակահատվածը, երբ Ատլանտիկայում մոլեգնել էին փոթորիկները։
Օգոստոսի վերջին Հարավային Ամերիկայի հյուսիսային առափնյա հատվածում ձեւավորվեց «Հարվի» փոթորիկը։ Վառ կապույտ զանգվածը, որը շարժվում է Մեքսիկական ծոցի հյուսիսային ափերի ուղղությամբ, աղի մասնիկներ են, որոնք տեղաշարժվում են փոթորկի հետ՝ դրա ուժգնացմանը զուգահեռ։ Հետո՝ սեպտեմբերի սկզբին, Աֆրիկայի արեւմտյան ափերին մոլեգնեց «Իրմա» փոթորիկը, սակայն այս դեպքում աղը խառնված էր Սահարա անապատի շագանակագույն փոշու աերոզոլի մասնիկների հետ։
Սեպտեմբերի վերջին տարածաշրջանում մոլեգնեցին «Մարիա» եւ «Խոսե» փոթորիկները, իսկ տեսանյութը եզրափակում է «Օֆելյա» փոթորիկը։ Դրա հետագիծը շատ անսովոր է. Սահարայի փոշեհատիկների մասնիկները հասել էին Եվրոպա՝ ստեղծելով «կարմիր երկնքի» էֆեկտ։