Գիտնականները պարզել են արյան ամենավտանգավոր խումբը

Արյան խմբի եւ մի շարք հիվանդությունների հանդեպ հակվածության միջեւ որոշակի կապ կա, պարզել են ԱՄՆ-ի Վերմոնթի համալսարանին կից բժշկական քոլեջի գիտնականները, որոնք ամփոփել են 3,5 տարի 30 հազար մարդկանց առողջությանը հետեւելու արդյունքները:

Դիտումների ընթացքում 495 մարդկանց մոտ սկսել են երեւան գալ հիշողության եւ մտավոր խանգարումների ախտանշաններ: Նրանց ֆիզիոլոգիական առանձնահատկությունները հետազոտվել են այն մարդկանց առողջության ցուցանիշների համադրությամբ, որոնք դեմենցիայի պրոցեսների հակում չունեին: Պարզվել է, որ առաջին խմբի արյուն ունեցողները մտավոր դեգրադացիայից ավելի լավ են պաշտպանված:

«Վերլուծությունը ցույց է տվել, որ արյան առաջին խումբ ունեցող մարդկանց շրջանում սիրտ-անոթային հիվանդությունների առաջացման վտանգը փոքր է, որոնք մեծացնում են հիշողության եւ դեմենցիայի զարգացման հետ կապված խնդիրների առաջացման հավանականությունը»,- հայտնել են աշխատության հեղինակները:

Իր հերթին, արյան չորրորդ խմբի առկայությունը, հակառակը, համահարաբերակցվել է դեմենցիայի զոհ դառնալու խիստ արտահայտված վտանգի հետ: Հետազոտողների խոսքով՝ այս խումբն ունեցող մարդիկ 82 տոկոսով ավելի շատ են հակված հիշողության եւ մտածողության հետ կապված խնդիրների առաջացմանը, քան արյան ուրիշ խումբ ունեցողները:

Մասնավորապես՝ գիտնականները հայտնաբերել են, որ արյան չորրորդ խումբ ունեցողներն առանձնացել են այն սպիտակուցի պարունակության բարձր մակարդակով, որն արագացնում է արյան մակարդելիությունը: Բժշկական լեզվով՝ նրանց մոտ բարձր է արյան մակարդելիության գործոն VIII-ը:

Կենսաբանները նշում են, որ այս յուրահատկության դեպքում մեծ է արյունատար համակարգում թրոմբի առաջացման, անոթների վատ անցանելիության հավանականությունը: Միեւնույն ժամանակ արյան շրջանառության խանգարումները սերտորեն կապված են մտավոր եւ ինտելեկտի խանգարումների առաջացման հետ:

«Գործոն VIII-ի բարձր մակարդակով մարդկանց շրջանում մտավոր խանգարումների առաջացման հակվածությունը 24 տոկոսով ավելի մեծ է՝ այն մարդկանց համեմատությամբ, ում արյան մակարդելիությունը պակաս ինտենսիվ է»,- հաստատել են հետազոտողները:

med.news.am/