ՀՀ կառավարությունը հավանություն տվեց հայ-ռուսական համատեղ զորախմբի համաձայնագրի վավերացման նախագծին

ՀՀ կառավարությունն իր այսօրվա նիստում հավանություն է տվել հայ-ռուսական համատեղ զորախումբ ստեղծելու համաձայնագիրը վավերացնելու մասին օրենսդրական նախաձեռնությանը։ Այն սահմանված կարգով կներկայացվի Ազգային ժողովի հաստատման։

Փաստաթղթում ասված է, որ համատեղ զորախումբը նախատեսված է Կովկասյան տարածաշրջանում ռազմական անվտանգություն ապահովելու համար, կոչված է կանխելու և հետ մղելու Ռուսաստանի և Հայաստանի դեմ հնարավոր զինված հարձակումը տարածաշրջանի սահմաններում: Զորախմբի խնդիրների մեջ է մտնում նաև երկու երկրների ցամաքային և օդային սահմանների պաշտպանությունը:
Համատեղ զորախումբը կիրառվելու է Ռուսաստանի և Հայաստանի Զինված ուժերի գերագույն գլխավոր հրամանատարների համատեղ որոշմամբ։ Խաղաղ ժամանակ զորախմբի գործողությունները կանոնակարգվելու են կողմերի գլխավոր շտաբերի համատեղ հրամաններով:
Զորախմբի մեջ են մտնում ՌԴ ԶՈւ՝ Գյումրիում տեղակայված 102-րդ ռազմաբազան և ՀՀ ՊՆ 5-րդ բանակային կորպուսի ստորաբաժանումների մի մասը:
Այս համաձայնագիրը ստորագրվել էր 2016թ․ նոյեմբերի 30-ին Մոսկվայում։
7or.am