«Մարդու իրավունքներն են կալանավորվել». Կարո Փայլանը՝ Թուրքիայում 6 հայտնի իրավապաշտպանների կալանավորման մասին

Թուրքական դատարանը թույլ չի տվել երկրի խորհրդարանի հայ պատգամավոր Կարո Փայլանին ներկա գտնվել տասը իրավապաշտպանների գործով լսումներին: Այս մասին Twitter-ի իր էջում գրել է Փայլանը՝ հավելելով, որ ստիպված է եղել բաց դռան հետեւից չորս ժամ լսել դատարանում տեղի ունեցող զարգացումները:

«Մեծ ամոթ: Իրավապաշտպաններ Իդլ Էսերը, Օզլեմ Դալքըրանը, Վելի Աջուն, Գյունալ Քուրշունը, Ալի Գարավին եւ Պետեր Ստոյդթները կալանավորվել են: Մարդու իրավունքներն են կալանավորվել»,-գրել է նա եւ հրապարակել կալանավորված իրավապաշտպանների հետ դատարանի դահլիճից դուրս արած լուսանկարը:

Ավելի վաղ NEWS.am-ը հայտնել էր, որ Թուրքիայի դատարանը վճռել է կալանքի տակ առնել 6 իրավապաշտպանների, այդ թվում՝ Amnesty International-ի թուրքական ներկայացուցչության ղեկավար Իդիլ Էսերին։ Նրանք մեղադրվում են ահաբեկչական կազմակերպությանն անդամակցելու մեջ։

Նախկինում կալանավորված եւս 5 ակտիվիստներ ստորագրությամբ ազատ են արձակվել։ «Այժմ պարզ դարձավ, որ Թուրքիայում մարդու իրավունքների համար պայքարելը հանցագործություն է»,- ասել էր Amnesty International-ի քարտուղար Սալիլ Շեթին։

Էսերն ու մյուս իրավապաշտպաններն իրավապահների հսկողության ներքո են հուլիսի 5-ից, նրանք մասնակցել են կազմակերպության ժողովներին, որը, իբր, «ցանկանում է շարունակել երկրում պետական հեղաշրջում իրականացնելու փորձերը»։

NEWS.am