Մեր ինքնության դեմ հայտարարված է պատերազմ

«Մեկ Հայաստան» կուսակցության հիմնադիր Արթուր Ղազինյանը գրում է.

«29 տարի առաջ Հայ ժողովուրդը որոշեց որոշեց ապրել անկախ և ազատ Հայաստանում և մեծ երազանքով դրեց ինքնիշխան, ժողովրդավարական, իրավական և սոցիալական պետության հիմքերը:

Մեզ սպասում էին ծանր փորձություններ, զրկանքներ, վերելքներ և անկումներ, հաղթանակներ ու պարտություններ, ոգևորություն ու հուսահատություն:

Արցախյան հաղթական հերոսամարտը, երկրաշարժի ծանր հետևանքները, ազգային և պետական ինտիտուտների աստիճանական զարգացումն ու կայացումը կոփեցին Հայկական երիտասարդ պետականությունը, ձևավորեցին ազգային և պետական իմունիտետ օրեցօր խորացող խնդիրների և սպառնալիքների նկատմամբ:

Զրկանքները հաղթահարելու, մարտահրավերներին դիմակայելու և մեր Հայրենիքում ապրելու ու զարգանալու բնական իրավունքի պաշտպանությունը արդյունավետ կազմակերպելու հարցում որոշիչ նշանակություն ունեցան սերունդների համերաշխությունը, Հայկական ինքնության հիմքերի ամրությունն ու մեր ժողովրդի Հայ լինելու հանգամանքը:

Մեր ինքնության դեմ հայտարարված է պատերազմ, ատելության ու թշնամության որդը խժռում է մեր միասնությունն ու համերաշխությունը, մասնատում ու ջլատում է մեր ներուժը՝ վտանգի տակ դնելով մեր հաղթանակներն ու ձեռքբերումները, Հայ մնալու մեր նախահայրերի պատգամը:

Ես հավատում եմ մեր ժողովրդի ոգու և կամքի ամրությանը, գիտակցությանն ու անհրաժեշտ պահին միավորվելու ուժին, հաղթելու ու հզորանալու մեր կամքին:

Վստահ եմ, որ Հայաստանի անկախության 30 ամյակը մենք կտոնենք միասնության և համերաշխության մթնոլորտում, հաղթանակածի ոգով ու ապագայի նկատմամբ անսահման հավատով»։