Աղոթում ենք, որ Տերը բազում հաջողություններով պսակի մեր սաների ուսումնառության ընթացքը․ Գարեգին Բ

Ն․Ս․Օ․Տ․Տ Գարեգին Բ Ամենայն Հայոց Կաթողիկոսը շնորհավորական ուղերձ է հղել Գիտելիքի օրվա առթիվ:

«Մայր Աթոռ Սուրբ Էջմիածնից Հայրապետական օրհնությամբ Մեր շնորհավորանքներն ենք բերում ուսանող եւ աշակերտ մեր զավակներին եւ կրթական գործի բոլոր նվիրյալներին՝ Գիտելիքի, գրի եւ դպրության օրվա առիթով:

Դարեդար մեր ժողովուրդը սիրո եւ մեծարումի զգացումով է ապրել գիտելիքի ու դպրության հանդեպ, պահպանել այն հակառակ ամեն փորձության եւ ավանդել մեզ իբրեւ անգին ժառանգություն, որը եւ դարձել է մեր հարատեւության գրավականներից մեկը։

Աշխարհում այսօր տարածված համավարակի հետեւանքով բազում մարտահրավերներ են առաջ եկել, դժվարություններ են հառնել նաեւ մեր կրթական հաստատությանց առջեւ ուսումնական գործընթացում։ Մենք աղոթք ենք վերառաքում առ Բարձրյալը, որ անխոչընդոտ մեկնարկի ուսումնական տարին եւ մեր զավակներին տոգորի նոր հույսերով, ուսումնատենչ ոգով ու աննկուն ջանասիրությամբ, որպեսզի գիտելիքն ու իմացությունը, հոգեւոր եւ բարոյական արժեքները շարունակաբար առանցքային եւ հիմնարար լինեն մեր ժողովրդի կյանքում։

Աղոթում ենք, որ Տերը բազում հաջողություններով պսակի մեր սաների ուսումնառության ընթացքը ու զորակից լինի մեր մանկավարժներին եւ կրթության գործի բոլոր մշակներին իրենց նվիրական եւ պատասխանատու կոչման եւ առաքելության մեջ:

Թող մեր Տիրոջ՝ Հիսուսի Քրիստոսի աստվածային սերն ու Սուրբ Հոգու առատ շնորհները միշտ մեր ժողովրդի հետ լինեն, ամեն»: