Սիրիան Ռուսաստանից կներկրի կորոնավիրուսի դեմ առաջին գրանցված պատվաստանյութը

Օգոստոսի 12-ին Դամասկոսի պետական համալսարանի տնօրեն Նպուղ ալ Աուն հայտարարել է, որ առաջիկա երկու-երեք շաբաթների ընթացքում Սիրիան Ռուսաստանից ներկրելու է վերջինիս գրանցած կորոնավիրուսի դեմ պատվաստանյութը: Դա տեղի կունենա այն բանից հետո, երբ Ռուսաստանն ավարտած կլինի իր վերջնական փորձերը և ապացուցված կլինի պատվաստանյութի անվտանգությունը: Այս մասին գրում է Բեյրութի Հայոց թեմի ազգային առաջնորդարանի «Գանձասար» պաշտոնաթերթը:

Աուն հայտարարել է նաև, որ շուրջ 20 պետություն Ռուսաստանից ցանկանում է ներկրել պատվաստանյութը և ՌԴ հսկողությամբ այն արտադրելու իրավունք է ստացել, ինչը դրական ազդեցություն կունենա կորոնավիրուսի հաղթահարման գործում:

Ինչպես ավելի վաղ տեղեկացրել էր Tert.am-ը, ՌԴ նախագահ Վլադիմիր Պուտինը կառավարության անդամների հետ խորհրդակցության ժամանակ հայտարարել է Ռուսաստանում կորոնավիրուսի դեմ աշխարհում առաջին պատվաստանյութի գրանցման մասին:

Կորոնավիրուսի դեմ աշխարհում առաջին գրանցված պատվաստանյութը «Սպուտնիկ V» («Спутник V») անվանումն է ստացել՝ 1957 թվականին արձակված Երկրի առաջին արհեստական արբանյակի անվան նմանությամբ:

«Սպուտնիկ 1»-ն ամբողջ աշխարհում ակտիվացրել է տիեզերական հետազոտություները։ Կորոնավիրուսի դեմ նոր ռուսական պատվաստանյութը միջազգային հանրության համար նման նշանակություն ունի, ուստի՝ այս համեմատության արդյունքում էլ այն «Սպուտնիկ 5» անվանումն է ստացել»,- ասվում է անվան ընտրության բացատրության մեջ: