Ընդդիմության քայլերթը Էրդողանին չի կանգնեցնի. New York Times

Հեղինակավոր New York Times ամերիկյան պարբերականն անդրադարձել է Թուքրիայի գլխավոր ընդդիմադիր ուժը համարվող Ժողովրդահանրապետական կուսակցության կազմակերպած և Անկարայից Ստամբուլ 450 կմ ձգվող «Արդարության քայլերթին»:

Ողջունելով ընդդիմադիրների դրսևորած կամքը, պարբերականը, սակայն, համոզված է, որ դա չի կանգնեցնի բռնակալ Էրդողանին:

Պարբերականը նաև նկատում է, որ Էրդողանը դեռևս չի փորձել խոչընդոտել քայլերթին:

Ըստ New York Times-ի՝ սա առավել կարևոր է մարդկանց մեկ գաղափարի շուրջ մոբիլիզացնելու հարցում և ծառայել է լիբերալ, ժողովրդավար հայացքների տեր այն թուրքերի շահերին, որոնք ցանկանում են տապալել Էրդողանի բռնապետությունը:

Հիշեցնենք, որ քայլերթով երկրի գլխավոր ընդդիմադիր ուժը համարվող ժողովրդահանրապետականներն իրենց բողոքն են հայտնում իրենց կուսակցությունից պատգամավոր Էսին Բերբերօղլուի կալանավորման առնչությամբ, որին իշխանությունները մեղադրում են պետական գաղտնիքներ բացահայտելու և հանրայնացնելու համար և դատապարտել են 25 տարվա ազատազրկման:

Քրդամետ պատգամավորների բազմաթիվ կալանավորումներից հետո սա քեմալականների թևից առաջին աղմկահարույց ձերբակալությունն ու կալանավորումն է:

Ընդդիմադիր ցուցարարներն Իզմիրի Հանրապետության հրապարակից ուղղվել են Ստամբուլ: Նրանց երթին մասնակցում է նաև Ժողովրդահանրապետական կուսակցության նախագահ Քեմալ Քըլըչդարօղլուն:

Նշենք, որ Ժողովրդահանրապետական կուսակցությունը հիմնել է Թուրքիայի հանրապետության հիմնադիր ու առաջին նախագահ Մուստաֆա Քեմալ Աթաթուրքը:

Ժողովրդահանրապետական կուսակցության անդամ է նաև հայազգի պատգամավոր Սելինա Դողանը։