Այստեղ անձերի խնդիր է դրված. ով կլինի դատավոր եւ ով կենթարկվի. ՀՅԴ երիտասարդները՝ ՍԴ-ի դիմաց

Ժողովրդի անունից խոսում են բոլորը, մենք, իհարկե, իրավասու չենք խոսել ամբողջ ժողովրդի անունից, բայց վստահ ենք, որ ժողովրդի մեջ կա ան հատվածը, որն ադեկվատ կերպով կկարողանա այս ամբողջ անօրինություններին արժանի պատասխանը տալ։ Այս մասին այսօր՝ հունիսի 26-ին, Սահմանադրական դատարանի դիմաց, լրագրողների հետ զրույցում ասաց ՀՅԴ երիտասարդները ՀՅԴ երիտթեւի անդամ Սեւակ Նազարյան։

Նշենք, որ ՀՅԴ երիտասարդները ակցիա են իրականացնում Սահմանադրական դատարանի դիմաց։ Նրանք իրենց հետ բերել են շղթայված պաստառ, որի վրա գրված է Սահմանադրություն եւ պատկերված են ՀՀ զինանշանն ու դրոշը։

«Տեսնում ենք, որ ընդդիմադիր դաշտում որոշակի պրոցեսներ են ընթանում։ Դրան զուգահեռ, կույր պետք է լինել չտեսնելու համար, ժողովրդի տարբեր շերտեր, մասնագիտական շերտերից սկսած մինչեւ հասարակ քաղաքացիները սկսել են գործող իշխանությունից դժգոհության պրոցես։ Սա հույս է տալիս, որ կարողանանք հավատալ այն պրոցեսին, որն ապագայում սկսվելու է եւ հաջողության է հասնելու»,- ասաց նա։

Ճշտող հարցին՝ ո՞ւմ միջոցով է լինելու այդ գնահատականը, Նազարյանն ասաց՝ ժողովրդի միջոցով. «Ժողովրդի անունից խոսում են բոլորը, մենք, իհարկե, իրավասու չենք խոսել ամբողջ ժողովրդի անունից, բայց վստահ ենք, որ ժողովրդի մեջ կա ան հատվածը, որն ադեկվատ կերպով կկարողանա այս ամբողջ անօրինություններին արժանի պատասխանը տալ»։

Հարցին՝ ի՞նչ քայլեր են պատրաստում ձեռնարկել իրենք, ասաց. «Այս պահին այս ակցիան ենք իրականացնում։ Հետագայում, հարգելով արտակարգ դրության կանոնները՝ հավաքներ մեր կողմից չի նախատեսվում այս պահին, սակայն դա չի ենթարդում, որ չի էլ լինելու։ Արտակարգ դրության անդադար երկարանալը չենք կարող ասել՝ ինչքան կտեւի, սակայն վստահ ենք, որ ինչ-որ մի պահի կամ դուրս է գալու կամ մենք այլ տարբերակների կփորձենք գնալ»։

Հարցին՝ ի՞նչ լուծում են իրենք տեսնում, Նազարյանն ասաց. «Մենք հեռու ենք այն մտքից, որ կարող ենք այստեղ սահամանադրական իրավունքի նորմերին համապատասխան ելույթ ունենալ։ Մենք ականատեսն ենք այս ամենի եւ փորձում ենք արձանագրել։ Արձանագրում ենք նաեւ, որ ՍԴ-ի դատավորներն այս ընթացքում շատ լավ վարք ցուցաբերեցին։ Տուրք չեն տվել Կառավարության կողմից առաջադրվող կիսակոռուպցիոն թոշակների ծրագրին։ Այդ ամեն ինչը չեն արել, որն էլ հույս է տալիս, որ ոչ միայն մենք ենք սատարելու, այլ պայքարը շարունակվելու է իրավական դաշտում։ 2018 թվականից մինչեւ այսօր այն ժողովուրդը, որը շարժման արդյունքում իր պահանջները ներկայացրեց իշխանություններին, ուզում էր ընդամենը արդարադատություն։ Այս պարագայում Հայաստանում ընտրովի արդարադատություն է։ Այստեղ անձերի խնդիր է դրված. ով կլինի դատավոր, ով կենթարկվի»։

ՀՅԴ Գերագույն մարմնին կից պետաիրավական հանձնախմբի նախագահ Մհեր Սահակյանն էլ նշեց, որ համոզված է՝ Հայաստանում սահմանադրական կարգը պետք է վերականգնվի.

«Համոզված եմ, որ տեղի է ունենում իշխանության յուրացում եւ քաղաքական իշխանությունն իր արկածախնդիր անձնային շահերը վեր է դասել պետական-ազգային շահերից»։

Հիշեցնենք, որ ՀՅԴ երիտասարդները գիշերը նույնպես ակցիա են իրականացրել Սահմանադրական դատարանի դիմաց։

Նշենք, որ ԱԺ նախագահ Արարատ Միրզոյանը պաշտոնական տեղեկագրում հրապարակել է Սահմանադրության փոփոխությունները։

Սահմանադրական փոփոխություններով բարձր դատարանի 9 հոգանոց կազմից հեռանում են այն անդամները, որոնց պաշտոնավարման 12 տարվա ժամկետը լրացել է։

Այդ փոփոխություններին դեմ են մի շարք իրավաբաններ, փաստաբաններ, իրավապաշտպաններ, ինչպես նաեւ ՍԴ անդամները։

Այսօր վաղ առավոտից ՍԴ-ի դիմաց էին հավաքվել ԲՀԿ-ական պատգամավորները, որոնք թղթային տարբերակով 26 պատգամավորի ստորագրությամբ իրենց դիմումն էին բերել Սահմանադրական դատարան՝ վիճարկելու Ազգային ժողովում ընդունված օրենքի սահմանադրականությունը։

ՍԴ-ի դիմաց էին հավաքվել նաեւ իրավապաշտպաններ, քաղաքական ու հասարակական գործիչներ, որոնք դեմ են սահմանադրական փոփոխություններին։ Նրանք պնդում են, որ արված փոփոխությունները սահմանադրական կարգի տապալում է։