ԵՄ առաջնորդները պատրաստվում են Ռուսաստանի հետ հնարավոր բանակցությունների. Կոշտա

Եվրոպական միության (ԵՄ) առաջնորդները պատրաստվում են Ռուսաստանի նախագահ Վլադիմիր Պուտինի հետ հնարավոր բանակցությունների, հայտարարել է Եվրոպական խորհրդի նախագահ Անտոնիու Կոշտան: Նրա խոսքը մեջբերել է բրիտանական The Financial Times (FT) թերթը։

Հաղորդագրության համաձայն՝ Եվրոպական խորհրդի նախագահն ասել է, որ Պուտինի հետ ԵՄ բանակցությունների ներուժ է տեսնում՝ նշելով, որ դաշինքն այս հարցում ստացել է Ուկրաինայի նախագահ Վոլոդիմիր Զելենսկու աջակցությունը։

«Ես բանակցություններ եմ վարում 27 անդամ պետության ղեկավարների հետ՝ որոշելու, թե ինչպես ենք լավագույնս կազմակերպվելու և կոնկրետ ինչ պետք է քննարկենք Ռուսաստանի հետ, երբ դրա համար հարմար պահ լինի»,- ասել է Կոշտան։ Նրա խոսքով՝ Պուտինի հետ բանակցությունների «ներուժ կա», բայց առայժմ «ոչ ոք չի տեսել» «լուրջ» քննարկումներին «արդյունավետ» մասնակցելու Ռուսաստանի պատրաստակամությունը: Կոշտան նաև նշել է, որ ԵՄ-ն մտադիր չէ միջամտել ԱՄՆ-ի գլխավորած բանակցություններին։

Վերջին անգամ Եվրոպայի և Ռուսաստանի միջև լուրջ երկխոսություն տեղի է ունեցել 2026 թվականի փետրվարի սկզբին, երբ Ֆրանսիայի նախագահի խորհրդականներ Էմանուել Բոնը և Բերտրան Բուխվալտերը այցելել են Մոսկվա՝ քննարկելու ԵՄ-ի հնարավոր մասնակցությունը Ուկրաինայում պատերազմը դադարեցնելու վերաբերյալ խաղաղ բանակցություններին: Այդ ժամանակ հաղորդվել էր, որ Կրեմլը մերժել է ֆրանսիական առաջարկները։

Մայիսի 8-ին ՌԴ նախագահի մամուլի քարտուղար Դմիտրի Պեսկովը լրագրողներին ասել է, որ Պուտինը պատրաստ է բանակցություններ վարելու Եվրամիության հետ, սակայն Ռուսաստանն ինքը նման շփումներ չի նախաձեռնի։