ՃՈ կանոնները մեկ այլ քաղաքացու կողմից խախտելը բջջայինով նկարելու մասին որոշումը՝ թեժ բանավեճի պատճառ կառավարությունում (տեսանյութ)
Մարդկանց անձնական տվյալների անձեռնմխելիությունը խախտող ևս մեկ որոշում քննարկվեց կառավարությունում, որի ժամանակ վարչապետ Փաշինյանը պնդեց անձնական տվյալները չպահպանելու իր համոզմունքը՝ հայտնում է Yerkir.am-ը։
Ի դեպ, դա առաջին նախագիծն էր, որ ներկայացրեց ՀՀ նորանշանակ Ոստիկանապետ Վահե Ղազարյանը։
Խոսքը «Պետական սեփականություն հանդիսացող հատուկ մշակված համակարգում բջջային հավելվածում գրանցված նույն անձի կողմից նույն տրանսպորտային միջոցի վերաբերյալ էլեկտրոնային հաղորդում ուղարկելու՝ ամսական և տարեկան առավելագույն քանակը, ինչպես նաև բջջային հավելվածի միջոցով արձանագրվող իրավախախտման տեսակները սահմանելու մասին» կառավարության որոշման նախագծի մասին է։
Ըստ էության, սա ենթադրում է, որ մի քաղաքացին մեկ այլ քաղաքացու վերաբերյալ կարող է տեղեկություններ հավաքել՝ բջջային հավելվածով արձանագրելով նրա՝ տրանսպորտային միջոցով թույլ տված խախտումը և ուղարկել իրավապահներին։
«Նախագծի ընդունման նպատակը ճանապարհային երթևեկության կանոնների խախտումները նաև բջջային հավելվածի միջոցով քաղաքացիներին արձանագրելու հնարավորություն տալն է»-ասաց Ոստիկանության պետը։
Նա նշեց, որ բջջային հավելվածը հասանելի կլինի Հայաստանում մշտապես բնակվող անձանց համար։ Ընդ որում հավելվածի միջոցով ստացված նյութի հիման վրա վարչական վարույթը իրականացվելու է, եթե այն հնարավորություն տա ներկայացնելու իրավախախտմամբ ամրագրված ֆիզիկական անձի, իրավախախտման գործիք հանդիսացող տրանսպորտային միջոցի համարանիշը, իրավախախտման ամրագրելու վայրն ու ժամանակը, բացի այդ տեսանյութը պետք է ուղարկված լինի առցանց ռեժիմով այդ նպատակով ստեղծված էլեկտրոնային հարթակին՝ որպես իրավախախտման մասին էլեկտրոնային հաղորդում։
Ըստ ներկայացված նախագծի՝ ամսական մեկ օգտատիրոջ կողմից միևնույն տրանսպորտային միջոցի վերաբերյալ կարող է ներկայացվել առավելագույնը 3, իսկ տարեկան՝ 30 էլեկտրոնային հաղորդում։
«Բջջային հավելվածի միջոցով հնարավոր կլինի արձանագրել առավել հաճախակի հանդիպող և սովորական քաղաքացու համար տեսանելի 12 տեսակի իրավախախտում․ դրանցից են հանդիպակաց երթևեկության գոտի դուրս գալը, կանգառի կայանման կանոնները խախտելը, լուսացույցի ազդանշանին չենթարկվելը, տրանսպորտային միջոցից աղբ նետելը և այլն»,-ասաց ոստիկանապետը։
Նա նշեց, որ նախագիծը լրամշակվել է ՄԻՊ աշխատակազմից ստացված առաջարկների հիման վրա։
Վարչապետը անհանգստացավ և բավական կտրուկ տոնով ասաց, որ այստեղ մի բան բաց են թողել՝ մեքենայի մեջ մեկ անձից ավել գտնվելու պարագայում դիմակ չկրելը արձանագրելը։
«Հա բայց, իրոք, հիմա ամենահրատապ հարցերից մեկն ա, պետք ա էդ է ավելացնել»,-ասաց Փաշինյանը։
Տիգրան Ավինյանն ասաց, որ դա անհնար է, քանի որ ՄԻՊ-ն ու ՀՀ արդարդատության նախարարությունն արձանագրել են, որ, օրինակ, ավտոմեքենայի ներսում գտնվող պրոցեսը՝ դիմակ, ամրագոտի կրելը նկարելը անձնական տվյալների խախտում է, հետևաբար այդ իրավախախտումները մեկ այլ ձևով են արձանագրվում․ դրանք Ճանապարհային ոստիկանությունն ինքն է արձանագրում։
Վարչապետին այս մեխանիզմը չբավարարեց, նա հետաքրքրվեց՝ ում վրա պատասխանատվությունը, երբ մեքենայում մեկ անձից ավելի է գտնվում։ Ոստիկանապետն ասաց, որ դրա պատասխանատվությունը վարորդի վրա է։
«Բայց մեքենայի ներսը նկարելով անձնական տվյալների ի՞նչ խնդիր կա, բա մենք քաղաքացիներին ասում ենք հակահամաճարակային շարժում ենք սկսում, չենք ուզում գործիք տա՞լ։ Պրն Բադասյան, ի՞նչն է պրոբլեմը»,-հարցրեց Փաշինյանը։
Արդարադատության նախարարը մանրամասն բացատրեց․ «Եթե անձինք տեսանկարահանում են կոնկրետ ժամի կոնկրետ վայրում՝ իրար վերաբերյալ տեղեկություններ են հավաքում, դա, միանշանակ, անձնական տվյալների մշակում է ու հաշվի առնելով՝ երբ է համաչափ, երբ՝ ոչ, այնպիսի իրավախախտումներն են արձանագրվում, որոնք հնարավորինս քիչ անձնական տվյալների մշակում են ենթադրում։ Այսինքն, անձին մեքենայի մեջ կոնկրետ օրը, կոնկրետ ժամին, կոնկրետ վայրում նմանատիպ անձնական տվյալներ հավաքելը խնդրահարույց է»։
Վարչապետը չհամաձայնեց՝ ինքնատիպ պատճառաբանությամբ․ «Դե ավելի լավ, դիմակով թող ըլնեն, չեն ճանաչի՝ ով ա, ինչ հարաբերությունների մեջ էլ լինեն։ Եթե մարդիկ մեքենայով տեղ են գնում և չեն ուզում՝ կողքից իրենց ճանաչեն, շատ լավ միջոց է՝ կրել դեմքը հնարավորինս լավ փակող դիմակներ։ Ապակիները մգեցնելու կարիք էլ չկա»։
Նախարարը նկատեց, որ տվյալ անձին նույնականացնելու մասով էլ է խնդիր լինելու։
Վարչապետը չնահանջեց․ «Առանց դիմակի մարդը պոտենցիալ սպառնալիք է ստեղծում մեկ այլ մարդու համար, ով է իմանալու՝ ով է մեքենայի մեջ նստած։ Դիմակով չի, պետհամարանիշը նկարեք»։
Արդարադատության նախարարը տեղեկացրեց, որ ըստ սահմանված կանոնների՝ ով դիմակով չէ, նա ինքն է պատասխանատվության ենթարկվում դրա համար։
Վարչապետն առաջարկեց․ «Դե ուրեմն, պետք ա փոխել։ Պատասխանատվությունը դնել վարորդի վրա։ Մեզ չի հետաքրքում՝ ով ա, մեզ հետաքրքրում ա՝ դիմակով ա, թե առանց դիմակի ա, և պետք է փոխել կարգավորումն այնպես, որ պատասխանատվությունը լինի վարորդի վրա»։
Եղավ մտավախություն, որ եթե անձնական մեքենաների համար ինչ-որ կերպ հնարավոր է, ապա հանրային տրանսպորտի պարագայում գրեթե անհնար է, որ վարորդը վերահսկի բոլորին։
Վարչապետն այս հարցում էլ պնդեց՝ եթե առանց դիմակի մարդ է նստում, վարորդը պետք է չվարի այդ մեքենան։
Արդարադատության նախարարաը խոստացավ ուսումնասիրել վարչապետի առաջարկներով որոշումը փոխելու հնարավորությունը, այսուհանդերձ, նախագիծն ընդունվեց այնպիսին, ինչպիսին կա։
Մանրամասն՝ տեսանյութում․
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Առանց ռուսական նավթի, երբ մոտ է վառելիքի գլոբալ դեֆիցիտը
Ղարաբաղից տեղահանվածները պետք է կապեն իրենց ապագան Հայաստանի հետ
Թրամփի խոսքերը Մակրոնի՝ պաշտոնից շուտափույթ hեռացման մասին, ստիպում են մտածել նրա հասցեին վենեսուելա...
Մակրոնը ոչ մի բառով չի դատապարտել Իսրայել-ԱՄՆ Իրանի դեմ պատերազմը. Արաղչի
Մենք ուզում ենք, որ դուք օր առաջ տնավորվեք ՀՀ-ում
Էապես կրճատվել է այն բնակավայրերի թիվը, որտեղ չկան և հասանելի չեն նախադպրոցական ծառայություններ
Պետական արգելոցի ֆոտոթակարդները կրկին նկարահանել են կովկասյան ընձառյուծին