Թուրքիայում 16 սպա և 19 ենթասպա է ձերբակալվել

Թուրքիայում 2016թ.-ի հուլիսի 15-ի հեղաշրջման փորձից հետո սկիզբ առած կադրային զտումներն ու զանգվածային ձերբակալությունները շարունակվում են:

Ինչպես հայտնում է թուրքական «Բիրգյուն» պարբերականը, թուրքական ԶՈւ-ի 35 անդամ այսօր ևս համալրել է գործազուրկների շարքը և ձերբակալվել: 16 սպա և 19 ենթասպա մեղադրվում է 2016թ.-ի հուլիսի 15-ի հեղաշրջման փորձի կազմակերպիչը համարվող Ֆեթուլլահ Գյուլենի «Հիզմեթ» շարժման հետ կապ ունենալու և հեղաշրջման փորձին մասնակցելու համար:

Թուրքական ԶՈւ-ի անդամների դեմ ոստիկանության հատուկջոկատայինները խուզարկողական միաժամանակյա գործողություններ են իրականացրել երկրի 20 նահանգում:

Հիշեցնենք, որ անցյալ տարվա հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: