Եթե գյուղացիները ապահովագրությունից չօգտվեցին, մենք հետագայում աղետի դեպքում նրանց չենք աջակցելու. Փաշինյան

Ներդրվել է գյուղատնտեսության ապահովագրության պիլոտային ծրագիրը որն ունի մի քանի բաղադրիչներ՝ վաղ ցրտահարության դեպքերից ապահովագրություն, հրդեհից ապահովագրություն, կարկոտից ապահովագրություն: Այս մասին այսօր՝ փետրվարի 6-ին, կառավարության նիստում հայտարարեց ՀՀ վարչապետ Նիկոլ Փաշինյանը:

Նրա նշեց, որ փետրվարի 15-ին լրանում է վաղ ցրտահարության դեպքերի ապահովագրության ժամկետը. «Գյուղացու ֆինանսական ծախսերի առնվազն 50 տոկոսը հոգում է կառավարությունը, իսկ ցրտահարության ռիսկի ապահովագրավճարն էլ փոխհատուցվելու է 60 տոկոսով: Այսօր արդեն ամսի 6-ն է եւ ապահովագրական պոլիսների գնման մակարդակը այնքան էլ բարձր չէ: Մենք ուզում են գյուղացիական տնտեսություններին կոչ անել օգտվել այս հնարավորություններից»,-ասաց Փաշինյանը:

Նա հիշեցրեց, որ նախկինում դեպքեր են եղել, երբ կարկտահարությունից տուժած գյուղացիներին սփոփիչ աջակցություն է տրվել կառավարության կողմից. «Սփոփիչ, որովհետեւ այն ամբողջ ծախսը չի փակել: Կայացված է քաղաքական որոշում, որ այն գումարը, որ մենք պետք է տանք գյուղացիներին տեղի ունեցած աղետներից հետո, մենք հիմա այդ գումարը, դեռ մի բան էլ ավելի այսօր ներդնում ենք ապահովագրության մեջ: Այսինքն այսօր ենք աջակցում, որ գյուղացիները ձեռք բերեն ապահովագրական պոլիսներ: Սա նշանակում է, որ եթե գյուղացիները ապահովագրությունից չօգտվեց, մենք հետագայում այլեւս չենք կարող որոշում կայացնել ու աջակցել այդ գյուղացիներին»,-ընդգծեց վարչապետը:

Նշվեց նաեւ, որ խաղաղի եւ ծիրանի համար հասանելի է գյուղատնտեսական ապահովագրությունը, որը հասանելի է 6 մարզերում՝ Արարատ, Արմավիր, Արագածոտն, Կոտայք, Վայոց Ձոր եւ Տավուշ: