Թրամփը Սպիտակ տանը հանդիպել է Գուայդոյի հետ

ԱՄՆ նախագահ Դոնալդ Թրամփը հանդիպել է Վենեսուելայի ընդդիմության առաջնորդ Խուան Գուայդոյի հետ, հայտնել է Սպիտակ տունը, փոխանցում է «ՌԻԱ Նովոստի»-ն:

«Նախագահ Դոնալդ Թրամփը Խուան Գուայդոյին ողջունել է Սպիտակ տանը: ԱՄՆ-ն կշարունակի աշխատել տարածաշրջանում գործընկերների հետ, որ հակազդի Վենեսուելայում ապօրինի բռնապետությանը եւ կանգնի վենեսուելացի ժողովրդի կողքին՝ ժողովրդավարական ապագայի ու բարգավաճման հասնելու համար»,- նշված է Twitter-ում հրապարակված Սպիտակ տան հաղորդագրության մեջ:

Ամերիկյան վարչակազմի ներկայացուցիչը հայտնել է, որ առաջիկա 30 օրում Վաշինգտոնը Վենեսուելայի դեմ նոր գործողություններ կձեռնարկի: ԱՄՆ ֆինանսների նախարարությունն ավելի վաղ Վենեսուելայի դեմ պատժամիջոցների ցուցակն ընդլայնել էր երկրի 7 քաղաքացիների հաշվին՝ ներառելով հայտնի խորհրդարանականների, որոնց թվում է Լուիս Պարան. նա Գուայդոյի փոխարեն ընտրվել է վենեսուելական խորհրդարանի խոսնակ, որն անօրինականորեն ինքնահռչակվել էր պետության ժամանակավոր ղեկավար:

2019 թվականի հունվարի 21-ին Վենեսուելայում մեկնարկել էին զանգվածային բողոքի ցույցերը նախագահ Նիկոլաս Մադուրոյի դեմ նրա երդմնակալությունից կարճ ժամանակ անց: Ազգային ժողովի խոսնակ, ընդդիմության ղեկավար Խուան Գուայդոն անօրինաբար ինքնահռչակվել էր որպես երկրի ժամանակավոր նախագահ: ԱՄՆ-ի գլխավորությամբ մի շարք Արեւմտյան երկրներ ճանաչել էին Գուայդոյին՝ որպես երկրի ղեկավար: Մադուրոն անվանել էր Գուայդոյին ԱՄՆ-ի խամաճիկ: Ռուսաստանը, Չինաստանը, Թուրքիան եւ մի շարք այլ երկրների սատարել էին Մադուրոյին որպես օրինական նախագահի: Մոսկվայում անվանել էին Գուայդոյի նախագահական կարգավիճակն անիրական: